KUCHING: Tiga buah parti di nengeri tu begulai enggau sebuah Gerempung Ukai Dikuasa Perintah (NGO) udah ngepunka pengawa numbuhka sebuah gempung parti politik baru ke diberi nama Gabungan Anak Sarawak (Gasak).
Presiden sementara, Bobby William madah Gasak ditumbuh ngambika nyadi alternatif gempung politik ngagai Gabungan Parti Sarawak (GPS) enggau Pakatan Harapan (PH).
Ku iya, komiti sementara Gasak diarika bala ketuai parti baka ari Parti Aspirasi Rakyat Sarawak (Aspirasi), Sarawak Workers’ Party (SWP), Sarawak for Sarawakians (S4S), Sarawak Independence Alliance (SIA) enggau Parti Bansa Dayak Sarawak Baru, ti mengkang nganti pengawa ngerejista ari Opis Ngerejista Gerempung (ROS).
“Pemutus ngerejista Gasak digaga pengudah aum kami ti ketiga kali kemari. Kebendar, kami udah dua kali baum sebedau tu,” ku iya madah ba aum pengarang berita ti gulu bala komiti sementara, ditu kemari.
Bobby ke mega nyadi presiden lebuh PBDSB dikinsil rejista dalam bulan Jun taun siti nyin tadi, madahka sida bisi ngangauka Parti Bumi Kenyalang (PBK) ngulu aum ketiga nya, tang nadai siku pan sida datai.
Taja pia madah, sida mereti sereta bebasaka pemutus PBK ti enda ngulu aum nya.
Ku iya, batang penemu numbuhka gempung nya endang kena nyeliahka sida besatup enggau pangan diri.
“Juluk kami iya nya bediri minta pilih ba semua 82 sitak nengeri ba pengawa bepilih nengeri (PRN), ti tau diatur sebarang maya, berengkah ari diatu.
“Tetiap parti tauka raban deka nudukka chalun ba sitak sida, lalu kami enda bediri minta pilih ba kerusi ke b isi alai raban gempung kami nya bediri minta pilih,” ku iya.
Sentang Gasak ke bedau direjista lalu baka nya mega enti PBDSB bedau direjista baru nyema pengawa bepilih nengeri diatu, Bobby madahka chalun ari PBDSB, S4S enggau SIA deka bediri minta pilih ngena logo Aspirasi tauka SWP.
Ku iya, taja pan sida udah nganjung surat rasmi kena ngapilka PBDSB setaun ke udah, tang lalu nadai berita sentang status PBDSB nyentuk ke diatu.
“Nya kebuah kami amat ngarapka ROS ngerejista Gasak ngambika kami tau nyadi gempung ke rasmi lalu ulih nguluka raban kami ba pengawa bepilih nengeri enggau pengawa bepilih besai ila.
“Tentu mega kami ngarapka ROS ngerejista baru PBDSB enggau naka pengelengkas, ngambika kami tau nyadi kaban ke sah dalam Gasak,” ku iya.
Bala komiti sementara ke sama bisi enggau dalam Gasak iya nya pemangku presiden SWP, Kapten (Pinchin) Engga Unchat (nyadi sapit presiden), presiden Aspirasi Lina Soo (chairman), sapit presiden Aspirasi, Buln Ribos (sekretari), chairman S4S Alex Leong (nyadi tukang awang), David Munan, Fong Pau Teck, Simon Tiong, Sai Malaka, Jeffrey Liew, Tan Kok Chiang, Chan Chee Hiong, Anyai John enggau Hugh Lawrence Zehnder (komiti).