Anda di sini

Bot ekspres di Sibu deka beoperasyen baka selama

Advertisement
 Terminal Bot Ekspres Sibu.
BEOPERASYEN BAKA SELAMA: Terminal Bot Ekspres Sibu.

SIBU: Bot ekspres ditu deka beoperasyen baka selama ngagai palan ke ngembuan zon gadung, taja pan Sibu udah nyadi zon kuning baru pengudah ngerikodka siti kes positif COVID-19 kemari, ku Penulung Pengatur Kunsil Sungai-Sungai Sarawak (LSS) Sibu (Kandang menua II) Hatta Morshidi.

Berindik ari tu ku iya, senentang atur ti enda ngemendarka pemindah tauka pejalai bot ekspres tu entara zon ke bebida chura, udah dibatak pulai baru, tang atur prosedur operasyen standard (SOP) mesti dikemeratka.

Hatta madah munyi nya lebuh dikerandau pengarang berita pasal sekalika bot ekspres beoperasyen tauka enda, taja pan bebida chura zon. Ambika chunto, baka Kapit mengkang nyadi zon gadung, tang Sibu diatu udah betukar nyadi zon kuning baru.

“Beoperasyen baka selama. Atur nagang pemindah entara zon ke bebida chura udah dibatak pulai baru, tang SOP endang dikemeratka,” ku iya.

Kilah ensanus, Komiti Mutarka Penusah Ngenyit Nengeri Sarawak(JPBN) madahka Sarawak bisi ngerikodka siti kes COVID-19 ke baru, ti ngujungka penyampau kumulatif diatu nyadi 571.

Berebak enggau tu, Chairman JPBN Datuk Amar Douglas Uggah Embas madah, kes positif Covid-19 ke pemadu baru diripotka bisi nyadi ditu, lalu status Sibu diatu nyadi zon kuning.

Kelimpah ari nya, Hatta madahka Terminal Bot Ekspres Sibu udah ngatur urung 1207 iku orang tambang, lalu 646 iku orang ke datai enggau 561 iku ti bekejang ari teminal kena 27 Jun.

Ku iya nambah, ungkup RC Pontoon Wharf, 251 iku orang tambang bisi dirikodka. Berindik ari penyampau nya, 134 iku orang ke datai sereta 117 iku ti bekejang.

Nangkanka nya ku Hatta, bot ekspres ke bisi ba ulu Sungai Rajang deka bekejang ari Terminal Bot Ekspres Sibu, lalu bot ke nuju palan baka Daro, Bruit, Igan, Passin enggau Mupong, bekejang ari RC Pontoon Wharf.