Anda di sini

Besaup ngaga polisi kena ngangkatka ekonomi

Advertisement
 Uggah enggau bini iya mandangka produk kompeni nya. Sama bisi dipeda dia, Pooh (bediri).
PRODUK SARAWAK: Uggah enggau bini iya mandangka produk kompeni nya. Sama bisi dipeda dia, Pooh (bediri).

KUCHING: Perintah deka ngaul sektor peribit ngaga polisi sosial ekonomi pengudah COVID-19, pia ku Sapit Kepala Menteri Datuk Amar Douglas Uggah.

Ku iya, polisi nya deka kena ngelakuka eksport pemakai ari nengeri tu nyengkaum ngelangkar insentif ngagai pemeranak puku, lalu mega kena nentuka bungkur kerejasama entara perintah enggau sektor peribit.

“Kami deka berunding enggau sektor peribit ba pengawa ngaga ‘pre-formula’ polisi tu,” pia ku iya lebuh ke ngelawaThian Yien Enterprise Sdn. Bhd, sebuah kompeni di nengeri tu ke endang batang pengawa ngaga mayuh macham bansa sos enggau produk pemakai restoran.

Kompeni nya ngeksport sos nya ngagai menua ASEAN enggau Hongkong, sereta mega benung dalam proses ngemansutka produk pemakai restoran ungkup ke dijual ba supermarket.

Uggah ke mega Menteri Betanam Betupi Moden, Tanah Adat enggau Pemansang Kandang Menua, madahka perintah deka nyaup ngerembaika kompeni nengeri tu ngambika ulih ngerembus makit ba renggat entarabansa.

Ku iya, tu kena nyapai juluk Kepala Menteri, Datuk Patinggi Abang Johari Tun Openg ti deka ke nengri nyadi palan pengeksport pemakai enggau produk pemakai manggai ba taun 2030.

“Enti kitai ulih ngasilka mayuh agi pemakai kelebih agi ke eksport, kitai ulih ngurangka defisit import kitai jemah ila, ke alai ba taun 2018 kitai bisi penyampau ke mayuh iya nya RM3.6 bilion,” ku iya, seraya madahka siti ari penanggul besai iya nya bekaul enggau ngaga pemutus sentang produk ti patut diasilka nengeri tu.

Uggah nemu nengeri tu bisi potensial besai sereta ngembuan mayuh tanah.  

“Kitai mega gaga ati enggau pemujur nyadi pengeluar pemakai ti manahka pengerai. Dalam dagang tu, orang pti pechaya ke kitai mih ke nyadi aset ke pemadu besai,” ku iya.

Ku Uggah, siti ari potensial nengeri tu iya nya industri berikan dalam  nengeri.

Iya mega nemu Thian Yen Enterprisebi bisi mantaika pengingin nupi undang ngambika dieksport.

“Kami nguji ngiga chara baka ni ngaduka pekara tu nyadi ‘win - win situation’,” ku iya.

Ku Uggah, kompeni siti chunto orang dagang nengeri tu ti udah mujur ti ulih mantu perintah ngemodenka sektor betanam betupi, kelebih agi kena nambahka penyampau eksport.

“Aku gaga amat ati meda pemujur sida,” ku iya.

Direktor besai kompeni nya, Pooh Chee Ngee mega bisi mai Uggah bejalai ngelingi meda pengawa ngaga produk ba kompeni nya.

Nyempulang Uggah, Sekretari Mendam Opis Menteri iya Edwin Abit enggau Direktor Opis Betanam Betupi Dr. Alvin Chai enggau bini Uggah, Datin Amar Doreen.