Anda di sini

Menua ti likun ulih nyungkak sektor dagang temuai di Malaysia

Advertisement
 Nancy disempulang Abdul Karim ba aum pengarang berita ‘Sesi Libat Urus YB Menteri Pelancongan, Seni dan Budaya Malaysia & YB Menteri Pelancongan, Kesenian dan Kebudayaan Sarawak’ ti diatur ba BCCK ditu, kemari. — Gambar Muhamad Rais Sanusi
MERI PENERANG: Nancy disempulang Abdul Karim ba aum pengarang berita ‘Sesi Libat Urus YB Menteri Pelancongan, Seni dan Budaya Malaysia & YB Menteri Pelancongan, Kesenian dan Kebudayaan Sarawak’ ti diatur ba BCCK ditu, kemari. — Gambar Muhamad Rais Sanusi

KUCHING: Menua likun alai datai nemuai tauka dilawa iya nya pekara ti pemadu dikemeratka ba atur pengawa muka baru sektor dagang temuai renggat antarabansa.

Menteri Dagang Temuai, Seni enggau Main Asal Malaysia, Datuk Seri Nancy Shukri madahka, nya dikena ngenukuka rayat Malaysia likun sereta ulih diseliahka ari pandemik COVID-19 ke nyadi ba serata dunya.

Malaysia ku iya, bekaul enggau sektor tauka industri dagang temuai kebendar udah ngemendar sereta muka garis entara menua antarabansa ke Singapura enggau Brunei tang mega pekara nya patut dipesetuju kededua raban ti bekaul (bilateral).

“Dalam pekara tu sida (baka Singapura tauka Brunei) patut bisi penetap sida empu, lalu kitai mega ngaga penetap kitai empu.

“Lalu udah tentu pekara ti pemadu dikemeratka kitai iya nya nentuka menua nya menua ti likun alai rayat kitai nemuai tauka datai.

“Kitai bepanggai ngagai lalau ari Opis Menteri Pengerai Malaysia (KKM) enggau Organisasyen Pengerai Dunya (WHO). Kitai udah nemu bagi menua ke udah Zon Gadung,” ku iya.

Nancy ti mega Kaban Parlimen (MP) Batang Sadong ditanya pekara nya ba aum pengarang berita ‘Sesi Libat Urus YB Menteri Pelancongan, Seni dan Budaya Malaysia & YB Menteri Pelancongan, Kesenian dan Kebudayaan Sarawak’, ti diatur ba BCCK ditu, kemari.

“Nambahka nya, kitai udah nemu chara pemadu jampat kitai mulaika pemanah baru ekonomi nengah dagang temuai iya nya ngena chara muka garis entara menua,” ku iya.

Nambahka nya lebuh ditanya sekalika timpuh kemisi ujung taun sekula ti udah diubah pandak agi ulih ngeruga sektor dagang temuai, Nancy madahka; “Aku ngasaika enda tentu ngeruga sektor dagang temuai laban diatu udah mayuh temuai sereta kemisi dalam menua tu empu.”

Lebuh ke bejaku ba pengerami nya, Nancy madahka Opis Menteri nya melabaka pengerugi industri dagang temuai enggau budaya dalam timpuh enam bulan keterubah taun 2020 (Januari ngagai Jun) iya nya dalam RM45 bilion.

Nya alai ku iya, perambu mulaika pemanah dagang temuai enggau main asal pasca-PKP (Atur Nagang Pemindah) patut chakah dipejalaika ngambika ekonomi menua ulih lengkas pulai manah baru.

Nyema enda lengkas dipejalaika, sektor dagang temuai enggau main asal menua deka mayuh rugi, ngelubahka pengawa mulaika pemanah industri enggau ekonomi lebuh igi penyakit tu majak nadai, ku iya.

Iya madahka, opis menteri udah ngelala mayuh strategi dalam ngelanggur mulaika pemanah industri dagang temuai enggau main asal menua.

“Nengah ejensi dagang temuai Malaysia, kitai ngenegapka inisiatif dagang temuai domestik nengah ‘Kempen Cuit-Cuti Malaysia’, ngenegapka aktiviti kaul enggau mensia mayuh sereta ngelakuka nengah media rama nyengkaum kerejasama ngena chara online enggau kompeni korporat, Key Opinion Leaders (KOL) enggau kebukai.

“Kitai mega deka ngemanahka kualiti produk enggau servis dagang temuai ngena chara idup baru kena nambahka pengarapka temuai datai kitu baru, nyentuk sida temuai deka lama agi diau ditu sereta ngelawa mayuh palan di menua tu.

“Dalam pekara tu, aku deka meransang menua enggau pengemeran industri ari kededua sektor dagang temuai enggau main asal nentuka servis enggau produk ti disediaka bekualiti tinggi lebih agi bekaul enggau pengelikun, pemeresi enggau pengerai,” ku iya.

Dulu ari nya Nancy berandau enggau sekeda pengemeran industri dagang temuai ba nengeri tu.

Iya disempulang Menteri Dagang Temuai, Seni enggau Main Asal Datuk Abdul Karim Rahman Hamzah enggau sida ke bukai.