Anda di sini

Projek ngaga Jalai Besai Kedua ‘ukai masau belanja’: Edwin

Advertisement

KUCHING: Projek ngaga jalai besai kedua ukai masau belanja, pia ku sekretari politik Kepala Menteri Edwin Banta.

Berindik enggau nya, iya madahka Parti Bersatu Sarawak (PSB) Datuk Joseph Entulu Belaun enda nemu pemaik projek ngaga jalai besai kedua nya ngagai pemansang ekonomi kandang menua sereta pengidup rayat.

“Peranak ba Sg Bekikis, Sg Kua/Nanga Arau enggau Ulu Selangau tau mantaika penusah ti ditapi sida maya diatu ketegal jalai ti enda tembu digaga ari baruh pegai Datuk Joseph Entulu.

“Berindik ari projek jalai alun ti enda tembu digaga, peranak ba kandang menua nya udah napi mayuh macham penanggul baka pemar dalam bedagangka asil betanam betupi sida, nganjung anak ke sekula, berubat pengerai ke manah enggau ngujungka pemindah besai ari menua pesisir ke mengeri,” ku Edwin ba penerang kemari.

Kena 16 Mac, Entulu madahka sepenyampau RM6 bilion udah diungkupka ba projek ngaga jalai besai kedua ti diperambu ke patut dikena memanah ke pemansang infrastruktur menua pesisir.

Entulu nyangkal komen Menteri Muda Perambu Mengeri enggau Rampa Menua Datuk Len Talif Salleh ti madahka Presiden PSB Datuk Seri Wong Soon Koh enggau Ketuai Raban Nembiak Dr Johnical Rayong Ngipa ‘nadai tanggungpengawa’ ba penerang sida ti madahka perambu projek jalai besai kedua nya ‘ngerua’.

Presiden PSB mega madahka parti politik sida deka ngungkupka sepenyampau RM6 bilion dikena ngangkatka tikas pengidup komuniti kandang menua pesisir ti nadai ngembuan bekal ai beresi, elekterik, servis telefon, arus internet, akses jalai alun ti manah enggau servis pengerai ti nadai chukup.

Edwin madahka, Entulu patut ngemeratka ngagai pemansang menua pesisir di Selangau maya iya ti nyadi Menteri Muda Pemansang Menua Pesisir enggau menteri ba Opis Menteri Besai.

“Iya engka ulih minta mayuh agi ungkus belanja dikena ba pemansang kandang menua pesisir enggau jalai alun di sitak iya.

“Tambah mega, iya patut ngemanahka akses internet ke pemaik ungkup raban nembiak kandang menua pesisir di Selangau,” ku iya.

Edwin minta ngagai Entulu nyukung projek kedua ti udah dilanggur ngambika peranak ba kandang menua ti tekeruga ‘bulih pemaik’ ari projek nya.

Advertisement