Anda di sini

Penanggul ke ditapi komuniti bebida nitihka endur sida sekumbang PKP

Advertisement

KUCHING: Sesi Randau ‘online’ ti diatur Suruhanjaya Hak Asasi Manusia (SUHAKAM) Sarawak bedau lama ti udah, beratika bisi sekeda isu enggau pemar ditapi komuniti sekumbang pentin Atur Nagang Pemindah (PKP).

Komisioner SUHAKAM Sarawak, Dr Madeline Berma madahka PKP udah ngeruga gaya pengidup semua rayat Sarawak lalu empas nya bebida bepanggai ba endur sida.

Ku iya, peranak di mengeri napi pemar bekaul enggau nadai agi kereja, penatai pemisi majak kurang, diketuka gawa enggau kereja ti enda meruan.

Lalu peranak menua pesisir enggau menua ulu Sarawak napi pemar lenyau penatai pemisi mata duit, pedis deka akses Bantuan Prihatin Nasional (BPN), Pakej Bantuan Sarawakku Sayang, ketegal pentin PKP kelimpah laun nerima bantu.

“Mayuh orang irau, PKP deka dilanjar lalu bantu duit ti diberi perintah nadai dikena nampung pengidup sida.

“Kelimpah ari nya, akses enda sama enggau bantu perintah ketegal palan ‘data’ raban B40 lalu enda diaduka baru sereta nadai mesin juruwang automatic tauka nadai di kandang menua pesisir tauka menua ulu ti ngenusahka peranak,” ku iya ngagai Utusan Borneo kemari.

Madeline madah Gerempung Ukai Dikuasa Perintah (NGO) pan mayuh betapi enggau pemar deka meri bantu ngagai raban ti begunaka bantu laban pejalai entara pelilih ditagang perintah lalu sida ditagang betemu enggau komuniti ti nadai pemendar ari perintah.

Ba awak ke sama mega, NGO napi penanggul ari sukut bantu ti majak kurang lalu semina bepanggai ba penatai duit ke mimit.

“Arus internet ti enda manah sereta akses dikena belajar enggau ngajar ke nadai, ngujungka e-belajar pedis deka digaga kelebih agi di kandang menua pesisir sereta menua ulu berindik ari sekula ti udah ditutup.

“Kelimpah ari nya, bisi sekeda garis lalau PKP (tagang) ngenusahka sida ti diau ba kandang menua pesisir. Ambika chunto, pejalai entara pelilih enggau pemindah ditagang semina 10 km udah meri penanggul ngagai komuniti menua pesisir sereta menua ulu ti deka berubat, meli barang ke guna ninting hari sereta ngaduka pengawa ba fasiliti bank,” ku iya.

Advertisement