BINTULU: “Nadai aktiviti ngabang maya musin pengerami Hari Raya Aidilfitri enggau Gawai Dayak taun tu,” ku Residen Bagi Menua Bintulu ti mega Chairman Komiti Mutarka Penusah Ngenyit Bagi Menua (JPBB) Bintulu Jack Aman Luat.
Ku iya madah, atur nagang pemindah tu udah diputuska Komiti Mutarka Penusah Ngenyit Nengeri Sarawak (JPBNS) ba aum kena 12 Mei nyin tadi.
“Kitai minta ngambika pemesai pelilih di opis pelilih madah ngagai semua ketuai kaum, ketuai komuniti, gerempung enggau ketuai ba renggat baruh ngambika sama bela madah sereta nerenakka pemereti ati ngagai peranak di genturung pendiau bekaul enggau atur nagang pengawa ngabang ungkup kededua pengerami nya,” ku iya lebuh ti nyuaka pemeri ngagai pekereja baris mua ba Laman Opis Residen Bintulu, bedau lama ti udah.
Ku iya madah, kena hari keterubah pengerami Hari Raya enggau Gawai Dayak ulih diintu tang enda ulih ngelui ari 20 iku dalam sebuah rumah sereta mesti diri sebilik aja, nya atur ti udah ditetapka.
“Atur tu dikena nyeliahka pengelekai COVID-19 laban nyema mayuh pemindah peranak enggau nembiak nengeri tu ari Semenanjung, Sabah, Labuan enggau ke bukai ti pulai ke nengeri tu ngembuan risiko ngerampit,” ku iya seraya nambah pengasi ba Prosedur Operasyen Standard (SOP) enggau atur ke bukai endang beguna dikena mutuska rentayan igi penyakit tu.
JPBNS ba aum media kena 13 Mei udah mutuska aktiviti ngabang Hari Raya enggau Hari Gawai semina dikemendar sehari aja.
Ngambi ari ripot surat berita, Chairman JPBNS Datuk Amar Douglas Uggah Embas madah, komiti nya udah mutuska tu nyadi garis lalau enggau SOP ungkup kededua pengerami nya di nengeri tu.
“Kelimpah ari nya, SOP tu mega natak penyampau orang ke datai iya nya semina diri sebilik aja. Enggau pemayuh enda ngelui 20 iku sehari,” ku iya.
Sapit Kepala Menteri nya madah, JPBNS deka numbuhka raban penerit adat dikena matau tikas pengasi bekaul atur tu.
Iya enda ngenggaika tu nyangka siti pekara ti mayuh penguji tang nama ti patut dikemerat iya nya ulih ngemunaska pengelekai igi penyakit COVID-19.
Ku Uggah madah, nama ti patut dikemerat iya nya rayat empu mesti nemu bekaul atur ti digaga perintah.
“Atur digaga ukai deka ngukum tang dikena nentuka semua rayat Sarawak gerai enggau likun ke lalu mega ulih mutuska rentayan pengelekai igi penyakit tu.
“Perintah nengeri endang ibuhka nyawa rayat Sarawak laban pemidang siku nyawa iya nya pengelenyau ti pemadu besai,” ku iya.