Anda di sini

Timpuh operasyen dagang di Bintulu dilanjar tang mesti nitihka SOP PKPB

Advertisement
 Raban polis enggau soldadu lebuh bejalaika operasyen matau enggau meresa ngagai sebuah kedai makai di Bintulu. — Gambar PDRM Bintulu
MERESA: Raban polis enggau soldadu lebuh bejalaika operasyen matau enggau meresa ngagai sebuah kedai makai di Bintulu. — Gambar PDRM Bintulu
__alt__

BINTULU: Operasyen restoran enggau kedai ba bagi menua tu dilanjarka ari pukul 7 pagi nyentuk pukul 10 malam enti dibandingka sebedau tu pukul 7 pagi nyentuk 8 malam nitihka atur ari Komiti Mutarka Penusah Ngenyit Nengeri Sarawak (JPBNS), tang pengelunggar atur tu agi mesti nitihka Prosedur Operasyen Standard (SOP) Atur Nagang Pemindah Nitihka Penetap (PKPB).

Residen Bagi Menua Bintulu ti mega Chairman JPB Bagi Menua Bintulu Jack Aman Kuat madah, operasyen dagang mesti nitihka garis lalau SOP ti ditetapka Kaunsil Pemansang Bintulu (BDA).

“Kami besetuju dalam aum deka ngelanjarka ngagai pukul 10 malam tang kami deka terit enggau penetap sereta atur SOP ungkup operasyen dagang ditu entara nya mesti ngena sengkabung idung enggau mulut, ‘hand sanitizer’ sereta meresa tikas pengangat tubuh mensia mayuh sebedau tama ke restoran pia mega netapka seraka 1 meter,” ku iya.

Iya madah munyi nya lebuh nyuaka pemeri kuih ungkup pengerami Hari Raya Aidilfitri enggau Gawai Dayak ngagai pekereja rintai mua ba begunan Opis Residen Bintulu, kilah ensana.

Nya alai, ku iya, kami bisi raban ngemata ti bejalaika pengawa meresa, meri kompaun enggau ke bukai nyema bisi sida enda nitihka SOP.

“Aku ngarapka jaku tangkan tu tau disadung ngagai semua, taja pan JPBB Bintulu nenduka maya operasyen dagang, tang kitai agi ba baruh PKPB ti begunaka komuniti nitihka SOP.

“Endang beguna amat nerenak sereta mai jaku lalau tu ngagai semua orang ba bagi menua tu ngambika nitih SOP ti ditetapka BDA enggau ejensi ti bekaul dalam pengawa nagang pengelekai COVID-19,” ku iya.

Ku iya nambah, jaku tangkan tu digaga berindik ari bisi orang ke bejual enda nitihka SOP PKPB tu, taja pan garis lalau lalu pekara tu udah dibantaika maya berengkah bejalaika operasyen.

”Bepelasarka ari pengawa matau enggau meresa BDA kenyau operasyen dagang berengkah dipejalai kena 12 Mei nyin tadi, bisi orang ke bejual kedai makai enggau penguna enda nitihka SOP ti udah ditetapka perintah, entara nya, nadai ngemeranka seraka sosial 1 meter maya duduk ba kedai makai ngujungka sida bededat dalam kedai,” ku iya.

Nya alai, ku iya nyemetak, tetiap penguna enggau pengempu premis mesti nitihka atur SOP PKPB dikena nentuka pengelikun orang ke bejual sereta mensia mayuh ulih dijaga.

Ku iya, nyema orang ke bejual enda nitihka SOP, JPBB Bintulu bisi hak narit baru maya operasyen nya.