KUCHING: Gerempung Bansa Dayak Sarawak (SDNU) meransang semua raban bansa Dayak nitihka prosedur operasyen standard (SOP) pengerami Hari Gawai Dayak taun ke dibantaika Komiti Mutarka Penusah Ngenyit Nengeri Sarawak (JPBN) maya benung betapi enggau pandemik COVID-19.
Presiden SDNU, Tan Sri William Mawan Ikom madahka SDNU nerima penemu Chairman JPBN Datuk Amar Douglas Uggah Embas, bekaul enggau SOP pengerami Hari Gawai nyengkaum pengerami tu dintu sehari aja.
SDNU mega setuju enggau penyampau orang ke tau ngabang ti ditatak enda lebih ari 20 iku sereta ungkup diri sebilik aja, ku iya.
“Kitai meretika pengingin raban bansa kitai pulai ke menua ngintu pengerami Gawai, tang pemindah entara pelilih menua di Sarawak semina dikemendarka enti bisi pemendar ari polis.
“Ke pengelikun enggau pengerai diri sebilik, kaban belayan enggau bala bakih, kitai patut enda ngaga aktiviti maya pengerami Gawai ke suah diatur sebedau tu, tang bepegai tegut ba pengawa asal baka miring lalu pengawa nya tau dudi.
“Ngagai ke bepengarap Kristian, dilalau ngambika seruran bejaga sereta nyaga seraka ari pangan diri, maya sembiang mantar Gawai lalu patut ngena sengkabung idung enggau mulut sereta suahka meresi jari,” ku iya nengah penerang berita, kemari.
Berindik ari ke enda ulih ngabang ngagai pangan diri ku iya, nya ukai nyadika penanggul laban mensia mayuh tau ngena kereban teknologi kena berandau enggau bala kaban belayan sereta bala bakih, kelimpah ari diri sebilik.
“Ngagai sida ke bisi arus internet ke manah, sida tau berandau enggau kaban belayan sereta bala bakih ngena video,” ku iya.