Anda di sini

Rega minyak sawit dipelabaka manah baru ketegal bisi import ari India

Advertisement

KUALA LUMPUR: Rega minyak sawit dipelabaka manah baru berindik ari pengimport India, meli baru minyak sawit ari Malaysia, pia ku Menteri Industri Ladang enggau Komoditi, Datuk Dr Mohd Khairuddin Aman Razali.

Ku iya, ubah ba penemu perintah India ti badu nagang pengawa ngimport minyak sawit, udah diserenih lalu perintah Malaysia deka nentuka seraka dagang nya rapit baru, udah mantu nambahka import ari menua nya.

Pekara bukai ti mantu nambahka import, iya rega ba dagang minyak sawit mata ke diatu ari baruh paras chukai duti eksport Malaysia, ku iya.

“Pemujur kaul diplomatik nya diatu majak manah nengah kunterik meli minyak sawit ungkup bulan Jun enggau Julai taun 2020.

“Perintah melabaka pekara tu deka meri empas positif ngagai industri sawit enggau ekonomi menua,” ku iya ba siti penerang, ensanus.

Ku Mohd Khairuddin, nitihka penerang Kaunsil Minyak Sawit Malaysia (MPOB), eksport minyak sawit Malaysia ke India ari bulan Januari ngagai April 2020, mandangka penurun ngenyit nyauka 94 peratus ngagai 96,145 tan, enti dibandingka enggau timpuh ke sama ba taun 2019, enggau penyampau eksport ba 1.6 juta tan.

Taja pia, minyak sawit ti didagangka ba Bursa Malaysia ngerikod mayuh penambah, iya nya 47 peratus ngagai 66,427 lot ensanus enti dibanding pukul rata 45,200 lot ninting hari, semanjai minggu siti nyin tadi, ku iya.

“Ngarapka nengah pemujur ke pemadu tu, India terus ngimport minyak sawit Malaysia kena ngenyukupka peminta guna minyak sayur enggau lemak menua nya,” ku iya.

Ku iya, Opis Menteri Industri Ladang enggau Komoditi begulai enggau MPOB sereta Kaunsil Minyak Sawit Malaysia bebendar gawa sekumbang timpuh pentin Atur Nagang Pemindah, ngatur sekeda randau nengah ‘online’, kena matak pengimport ari India ngambika meli minyak sawit Malaysia.

India mega entara kaban dagang Malaysia ke pemadu beguna dalam sektor agrikomoditi.

Menua nya mega pengimport minyak sawit enggau produk bepelasarka sawit ke pemadu mayuh ba taun 2019, enggau penyampau 4.5 juta tan minyak sawit sereta produk bepelasarka sawit beungkus, RM9.8 bilion.

Penyampau eksport tu nambah urung 67 peratus enti dibandingka enggau ba taun 2018, ke alai penyampau eksport bisi 2.7 juta tan.

Mohd Khairuddin nyemetak madahka perintah Malaysia, komited nyaga kaul manah enggau perintah India lalu ngemanahka agi kaul diplomatik enggau dagang kededua menua.

Kaul tu mesti bisi ngambika pekara ti dikemerat kededua menua ulih dijaga lalu rayat ulih ngasaika asil nya, ku iya.

Industri sawit menua meri penatai pemisi ngagai urung 500,000 pekebun mit sawit nyengkaum urung 258,000 pekebun mit ti ngatika diri. — Bernama