Anda di sini

Indit bejadi pengawa muka pintu penama garis entara menua di Lubok Antu

Advertisement
 Indit (lima kanan) nyuaka pemeri ngagai Bapa Adenan (dua kiba) ti deka diberi ngagai peranak di Kalimantan Barat.
UNGKUP KE GUNA: Indit (lima kanan) nyuaka pemeri ngagai Bapa Adenan (dua kiba) ti deka diberi ngagai peranak di Kalimantan Barat.

LUBOK ANTU: Chairman Mutarka Penusah Ngenyit Bagi Menua Sri Aman ke mega Residen Bagi Menua Sri Aman Indit Bangai udah bejalaika pengawa ngabas sereta bejadika pengawa muka pintu penama garis entara menua Sarawak, Malaysia di Lubok Antu di Nanga Nadai ditu, ensanus.

Komiti Mutarka Penusah Ngenyit Bagi Menua Sri Aman dalam penerang media kemari madah, pengawa muka pintu penama garis entara menua nya tuju dikena mekal barang pemakai ngagai Kalimantan Barat, Indonesia.

Ku iya,perintah Sarawak udah setuju enggau peminta ari Gabenor Kalimantan Barat muka pintu penama garis entara menua di Lubok Antu (Nanga Nadai), Tebedu (Entikong) enggau Biawak (Aruk) ba tuju nya.

Ku iya baru, atur khas muka pintu penama nya dipejalaika nengah chara ‘one off’ kena meri kerejasama nentuka proses nganjung bekal pemakai ke Kalimantan Barat  mujur.

“Tuju pengawa muka pintu penama pemakai ke Kalimantan Barat ngambika ulih nganjung bekal pemakai ungkup ke guna peranak di Kalimantan Barat ti tekeruga ketegal pengelekai COVID-19,” ku penerang nya baru.

Dulu agi ari tu, pemutus setuju nya digaga bepelasarka pengandal bekaban ti besepiak enggau pangan diri entara Sarawak enggau Kalimantan Barat sereta kerejasama ekonomi entara kededua kandang menua ari baruh SOSEK MALINDO.

Berebak enggau nya, pengawa nganjung pemakai nya ngena dua buah kontena ti mai pemakai ninting hari, lalu sebuah trak pemerat 10 tan ti khas dikena mai telu.

Dua buah kontena enggau sebuah lori semina dikemendar sangkai di ICQS Lubok Antu sebedau barang nya dipindah ngagai lori sereta trak Soldadu Menua Indonesia (TNI) dibai tama ngagai PLBN Nanga Badau.

Sama bisi datai ba pengawa tu iya nya Bapa Adenan, Pak Chamat Indonesia sereta ke bukai.