KUCHING: Gabungan Parti Sarawak (GPS) nandu baru madahka sida enda begilik penemu ngetan sereta nyaga hak enggau pekara ti dikemeratka Sarawak, taja pan diatu enggau numbuhka Perintah Besai ke ari baruh iring Menteri Besai, Tan Sri Muhyiddin Yassin.
Sekretari Besai GPS, Datuk Alexander Nanta Linggi madah, parti nya nyukung Muhyiddin nyadi Menteri ketegal dekaka menua tu tegap.
“Pemereti ati tu mega siti langkar sesebuah perintah ngambi ulih bejalaika pengawa. GPS bakih dalam Perintah Besai,” ku iya nengah siti penerang berita kemari.
GPS enggau numbuhka Perintah Besai begulai enggau siti gempung ke diberi nama Perikatan Nasional (PN), ti ditumbuhka begulai enggau Bersatu, UMNO, PAS, MCA sereta beberapa iku ex-Kaban Parlimen PKR.
Perintah Besai ti ditumbuhka Pakatan Harapan (PH) ari baruh pegai Tun Dr Mahathir, tumbang kena bulan Mac tu tadi, pengudah ex-Menteri Besai nya ngelengkaka pangku pengawa nya.
Berindik ari nya, Muhyiddin dichiri nyadi Menteri Besai Kelapan.
Apin lama udah, media bisi mantaika GPS, Barisan Nasional (BN), Parti Pribumi Bersatu Malaysia (BERSATU), PAS, Parti Bersatu Sabah (PBS) enggau Parti Solidariti Tanah Airku (STAR) meri sukung ngagai pengawa numbuhka PN.
Sukung nya dipadahka ba sebengkah penerang ti disain begulai enggau Presiden BERSATU Tan Sri Muhyiddin Yassin; Chairman BN Datuk Seri Dr Ahmad Zahid Hamidi; Presiden PAS Datuk Seri Abdul Hadi Awang; Chairman GPS Datuk Patinggi Abang Johari Abang Openg; Presiden PBS Datuk Seri Dr Maximus Ongkili enggau Presiden STAR Datuk Dr Jeffrey Kitingan.