Anda di sini

Rega semilan bansa barang udah ditetapka ungkup SHMMP Hari Raya, 11 barang dalam SHMMP Gawai

Advertisement
 Raban KPDNHEP Pampang Sarikei benung meresa rega barang ba sekeda palan di Pasar Sarikei, kemari.
MATAU: Raban KPDNHEP Pampang Sarikei benung meresa rega barang ba sekeda palan di Pasar Sarikei, kemari.

SARIKEI: Bisi semilan bansa barang udah ditetapka rega maksimum ungkup bejalaika Skim Rega Maksimum Musin Pengerami (SHMMP) Hari Raya Puasa lalu 11 bansa barang udah ditetapka ungkup SHMMP Hari Gawai Dayak.

Ketuai Pampang Opis Menteri Dagang Dalam Nengeri enggau Pekara Penguna (KPDNHEP) Pampang Sarikei, Mohamad Zawawi madah, berindik ari pengerami Hari Raya Puasa ti diperambu deka diintu kena 24 Mei 2020 ba selampur menua, hari bulan SHMMP nya berengkah dipejalai kena 20 Mei nyentuk 3 Jun 2020 iya nya pengelama 15 hari.

“Pia mega ungkup Hari Gawai Dayak ti deka diintu di Sarawak kena 1 Jun 2020, Skim Rega Maksimum Musin Pengerami (SHMMP) Hari Gawai deka dipejalai berengkah 28 Mei nyentuk 3 Jun 2020 iya nya pengelama tujuh (7) hari.

“Entara bansa barang ti udah dirintai ungkup SHMMP Hari Raya iya nya manuk idup (RM7.80 sekilogram), manuk ‘standard’ (RM9.00/kg), manuk ‘super’ (RM9.50/kg), dagin chapi import (RM27/kg), telu manuk gred A (RM0.39 sigi), telu manuk gred B (RM0.38 sigi), telu manuk gred C (RM0.37 sigi), buah nyiur (RM1.30 ungkup rega pemurung) lalu nyiur parut (RM5/kg).

“Ungkup SHMMP Hari Gawai, manuk idup (RM7.80 sekilogram), manuk ‘standard’ (RM9.00/kg), manuk ‘super’ (RM9.50/kg), manuk tuai idup (RM7.50/kg), sayap manuk (RM13/kg), telu manuk gred A (RM0.39 sigi), telu manuk gred B (RM0.38 sigi), telu manuk gred C (RM0.37 sigi) lalu dagin jani perut (RM19.50/kg) sereta dagin jani iya nya isi enggau lemak jani (RM18.50/kg),” ku iya ba penerang media ditu, kemari.

Kena nentuka nadai rega ti ditikika sepeneka ati ari orang dagang ti deka beambi ulih, notis deka dipansutka ari baruh Seksyen 21, Akta Kawalan Harga dan Antipencatutan 2011 ngagai orang dagang ke nikika rega barang ketegal ti deka ngulihka untung jampat.

Ku iya nambah, ungkup penyalah nyual barang ti dijaga rega nya ke lebih ari rega maksimum, orang siku-siku ulih ditinggang ukum ari kort nyentuk ke RM100,000 tauka dijil enda ngelui tiga (3) taun tauka kededua nya tauka nerima kompaun nyentuk RM50,000.

“Ungkup kompeni, sida ulih ditinggang ukum nyentuk ke RM500,000 tauka nerima kompaun nyentuk RM250,000 nyema ditemu salah.

“Ungkup penyalah ti enda ngengkahka tanda rega chura kalas ungkup barang ti dijaga, orang siku-siku tau ditinggang ukum nyentuk RM10,000 tauka nerima kompaun nyentuk RM5,000, lalu kompeni ti ditemu salah mega deka ditinggang ukum RM20,000 tauka nerima kompaun nyentuk RM10,000,” ku Mohamad nyemetak.

Dikena nentuka orang dagang seruran nitihka atur, ku iya, Pemesai Penerit Adat KPDNHEP Pampang Sarikei deka bisi ba palan ti suah dilawa mensia mayuh bebelika barang.

“Kitai deka mekuhka ngagai pasar mensia mayuh, pasar tamu enggau palan bebelika barang dikena bejalaika pengawa meresa enggau matau.

“Pengawa tu mandangka pengeransing raban kami nyaga hak penguna ari orang dagang ti deka beambi ulih maya musin pengerami.

“Raban kitai mega deka chakah bejalaika pengawa meresa nengah Pemesai Pengawa Meresa Rega ti bejalaika pengawa meresa rega barang ti diguna besesehari ba selampur Bagi Menua Sarikei,” ku iya.

Ku Mohamad nambah, nyema orang dagang bisi ditemu enda nitihka undang-undang ti bekaul enggau skim tu, mensia mayuh tau ngeripotka ngagai opis menteri nengah ‘hotline’ KPDNHEP ba lumur 1-800-886-800 tauka ba laman web e-Aduan KPDNHEP ba http://e-aduan.kpdnhep.gov.my tauka nengah ‘Whatsapp’ ba lumur 019-2794317 tauka datai kediri ba sebarang opis menteri ti besemak.