Anda di sini

Lapan hari bejurut nadai ngerikodka kes positif COVID-19 baru

Advertisement
 Uggah disempulang Dr Sim (kiba) enggau ke bukai ba aum pengarang berita COVID-19 Sarawak, kemari.
MAJAK MANAH: Uggah disempulang Dr Sim (kiba) enggau ke bukai ba aum pengarang berita COVID-19 Sarawak, kemari.

KUCHING: Naka kemari, Sarawak bisi empat pelilih menua dalam kategori Zon Kuning enggau lapan hari bejurut nadai ngerikodka kes positif COVID-19 baru.

Sapit Kepala Menteri, Datuk Amar Douglas Uggah Embas ti mega Chairman Komiti Mutarka Penusah Ngenyit Nengeri Sarawak madahka pekara nya ba Aum Pengarang Berita COVID-19 Sarawak.

“Sehari tu (kemari) Pelilih menua Lundu udah betukar status ngagai Gadung pengudah nadai kes diripotka dalam timpuh 14 hari ke udah.

“Nya alai penyampau pelilih menua dalam status kuning diatu bisi empat buah enggau pelilih menua bestatus Gadung iya nya 36 buah.

“Sehari tu (Kemari) mega kitai gaga ati laban Sarawak nadai kes positif COVID-19 baru diripotka. Penyampau semua kes positif COVID-19 di Sarawak agi 544 kes,” ku iya ba aum pengarang berita ti diatur ba Begunan DUN Lama ditu.

Empat Pelilih menua ke agi dalam kategori Zon Kuning iya nya Kuching, Tebedu, Sibu enggau Serian.

Kemari bisi 16 kes baru udah gerai sereta dikemendarka pansut ari sepital, lalu semua kes nya nyadi ari Sepital Besai Sarawak.

“Semua kes positif COVID-19 ke udah gerai enggau pansut ari sepital bisi 455 kes tauka  83.64 peratus,” ku iya seraya madahka bisi 71 kes benung diperubat ba sepital enggau siti kes ba Unit Siru Intu (ICU),

Nambah nya, bisi lapan PUI diripotka kemari enggau 18 kes agi nganti pemutus makmal.

Kelimpah ari nya Uggah madah bisi 6,051 penyampau peminta pemindah entara pelilih menua bisi diterima ba 28 buah Indu Opis PDRM serata Sarawak, ti nyadika penyampau semua naka ke diatu bisi 49,623 peminta.

Ari penyampau semua peminta nya, bisi 45,819 udah dikemendarka enggau 3,8043 enda diterima, ku iya.

Nyentuk kemari mega, bisi 29,924 pemadah sektor ekonomi ti udah dibuka diterima, lalu ari penyampau nya bisi 21,824 dipadah nengah ‘online’ enggau 8,100 nengah email.

Ba pekara ke bukai, iya madahka Raban Angkatan Tentera Malaysia (ATM) bisi tetemuka lima bungkus ke ngembuan leka penuh ti dipelabaka dadah bansa syabu pemerat 5kg ba ‘jalai tikus’ semak enggau Inland Port Tebedu iya nya penyauh 200 meter ari garis menua Malaysia/Indonesia.

“Semua nya berega RM422,730 udah dibai ngagai Balai Polis atur ke patut nangkanka nya dipejalaika.

“Bisi dua (2) PATI ari Indonesia mega udah diburu pulai,” ku iya dalam aum pengarang berita ti disempulang Menteri Kaunsil Kandang Menua enggau Pengawa Berumah Dato Sri Dr Sim Kui Hian enggau ke bukai.