KUCHING: Gerempung Bansa Dayak Sarawak (SDNU) nyukung jaku lalau Gerempung Perubat Malaysia (MMA) Pampang Sarawak ti minta peranak Sarawak ke diau di luar nengeri tu ngambika enda pulai kitu maya pengerami taun tu, baka pengerami Gawai Dayak.
Presiden SDNU, Tan Sri William Mawan Ikom madahka gerempung minta kitai nerang tauka ngelalau diri sebilik, bala bakih enggau kaban belayan ke gawa di menua tasik tauka menua bukai di Semenanjung Malaysia ke bisi ati deka pulai ke menua ngintu pengerami Gawai Dayak, ngambika nangguhka dulu pemulai nya.
Kebuah pia ku iya, Malaysia napi implikasyen perubat ti chukup besai sereta balat berindik ari penyadi COVID-19 sereta Atur Nagang Pemindah (PKP) ti benung dipejalaika diatu.
“Kitai patut bejejimat enda ngira nama pemutus ke digaga ti enda mai penusah tauka ngeruga pengelikun diri enggau orang ti dikesayau.
“Dalam pekara tu, SDNU setuju enggau MMA sereta Komiti Mutarka Penusah Ngenyit Nengeri Sarawak, ti minta semua kaban enggau pampang SDNU ngambika bekerejasama sereta nagang dulu, lalu beratika baru langgur Gawai taun tu.
“Kitai meretika pengingin ati ti deka betemu enggau diri sebilik sereta bala bakih, tang tu ukai semina bekaul enggau pengerami Gawai aja, tang tu pasal idup enggau mati,” ku Mawan ti mega Kaban Kunsil Nengeri Pakan nengah penerang berita ensanus.
Berebak enggau tu, Mawan meri puji ngagai raban pengereja pengawa rintai mua ti chukup bebendar nagang COVID-19 ari terus berampit di Sarawak.
Iya ngarapka Sarawak terus ngetan sereta ngerikodka nadai kes positif COVID-19.
“Nya alai sekali agi aku minta kitai ngambika terus ngemeran sereta ngemeratka seraka sosial, mai ‘hand sanitizer’ enda ngira kini penunga, sereta kena mih sengkabung idung enggau mulut,” ku iya.