KOTA SAMARAHAN: Dalam timpuh dua hari bisi 535 iku nembiak institusyen pelajar tinggi (IPT) di Sarawak udah dianjung pulai ke menua sida.
Nitih ku penerang berita Universiti Malaysia Sarawak (UNIMAS), proses nganjung pemulai nembiak kilah ensanus bisi 465 iku enggau kemari bisi 70 iku.
Ari penyampau semua nya, bisi 278 iku nembiak nya pulai ke Semenanjung Malaysia enggau 257 iku agi ngena perengka pengangkut darat pulai ke Miri, Bintulu, Sarikei enggau Betong.
UNIMAS nyadi koordinator ti ngatur bekaul enggau perengka pengangkut ungkup program nganjung pulai nembiak IPT di Sarawak ngagai bagi menua dalam Sarawak, Sabah enggau Semenanjung Malaysia, pengudah sida nya diau dalam kampus sepemanjai timpuh Atur Nagang Pemindah (PKP) berengkah 18 Mac 2020.
Sebedau dikemendarka enggau program tu nembiak deka diperesa pengerai dulu sereta beg ke dibai pulai mega diberesi (disanitasyen) sebedau tama ke dalam perengka pengangkut ti disediaka.
Proses nganjung pemulai nembiak tu dibantu enggau kerejasama ari Opis Bomba enggau Penyelamat Malaysia ti mantu meresi bas ti disediaka sebedau nembiak tama lalu Polis Diraja Malaysia (PDRM) mantu nentuka Prosedur Operasi Satandard (SOP) baka penyauh seraka sosial sereta atur ngena sengkabung idung enggau mulut dititihka.
Kelimpah ari nya, sepemanjai pejalai nya, nembiak deka disempulang siku Pegawai Perhubungan UNIMAS enggau dua iku deriba bas sepemanjai timpuh pejalai nyentuk datai ba palan ke dituju.
Nembiak mega enda dikemendarka nukar endur duduk tauka ngubah pejalai asal ke dituju sida.