KAPIT: Ketuai Komuniti Dayak Bagi Menua Kapit Temenggong Wilfred Billy Panyau ,madahka rayat patut beterima kasih ngagai perintah ti udah ngintu pengelantang pendiau sida nengah nyendiaka barang ti diguna besesehari baka bansa bantu pemakai.
“Kena munaska sereta nagang virus COVID-19 ti majak ngelekai, Perintah, sekalika perintah besai tauka nengeri nadai pilih bukai tang netapka Atur Nagang Pemindah (PKP) kenyau 18 Mac ngagai 14 April.
“Virus tu enda baka virus selama, bedau bisi antibiotik tauka ubat naka ke diatu.
Virus tu tau nabanka nyawa pesakit. Perintah udah bejalaika mayuh macham pekara ngambi atur ninting hari dikena munas, nagang pengelekai virus, ngasuh Orang Ti Dipelaba (PUI) sereta mensia mayuh ti pulai ari menua luar tauka gawa ba luar menua dikuarantin pengelama 14 hari.
“Lebuh perintah ngaga semua atur ti patut dikena nagang pengelekai virus tu, rayat mesti meri timbal ti positif, iya nya nengah kerejasama penuh enggau ejensi penerit adat ngambika nadai reregap ngapa.
Diau di rumah aja. Tu mih sukung moral kitai ke nyadi rayat ti bisi tanggungpengawa,” ku Billy.
“Endang amat PKP meri tatak ngagai pejalai mensia mayuh. Ukai semina peranak ba menua pesisir dilalau diau ba rumah panjai sekumbang timpuh nya.
Orang dagang nutup kedai sida lalu kedai pemakai tauka ngirup semina dikemendarka ‘tapau’ iya nya mai pulai pemakai tauka ai irup ti dibeli. Tu mih pekara ti patut dikemeranka, kitai semua mesti nitihka atur ti udah dipadahka ejensi penerit adat,” ku iya nandu.
“Mensia mayuh patut beterima kasih ngagai perintah nengeri tauka perintah besai laban meri mayuh macham bantu dikena mantu ruang bilik ti tekeruga ketegal PKP.
“Perintah nemu penusah ti ditapi rayat. Bantu diberi nengah Komiti Mutarka Penusah Ngenyit sereta YB sekalika Kaban Parlimen enggau Kaban Kunsil Nengeri nyadung bantu pemakai ngagai ruang bilik ti tekeruga dikena ngelempungka tating belanja sida berindik ari PKP.
“Lebuh ti begunaka bantu baka ke diatu sekumbang PKP, perintah udah meri bantu. Bantu pemakai sereta mantaika PRIHATIN mandangka perintah ibuhka rayat. Nya alai kitai mesti beterima kasih ngagai perintah,” ku Billy lebuh dikerandau The Borneo Post ba Komplek Nengeri Bletih, kilah ensanus.
Iya bisi dia laban ngemataka pengawa nyadung bantu pemakai ngagai peranak menua pesisir.
Tetiap ruang bilik nerima bantu pemakai baka berau, gula, tepung, susu pekat, teh, kopi, minyak enggau sumai, sereta ke bukai.