KUCHING: Sarawak deka nitihka pemutus Kaunsil Pengelikun Menua (MKN) nyema ngaga pemutus ngelanjarka baru timpuh Atur Nagang pemindah (PKP) berindik ari pandemik COVID-19 ti nuntung menua diatu.
Kepala Menteri Datuk Patinggi Abang Johari Tun Openg madahka, taja pan gaya COVID-19 di nengeri tu agi ulih dijaga, Sarawak agi patut nitihka atur ti dipansutka MKN.
“Nama ti deka dipadahka aku gaya kitai ditu agi ulih dijaga, reti nya kitai ulih nyaga pengelekai COVID-19 tu.
“Tang kitai patut nitihka pemutus MKN (nyema pemutus timpuh PKP dilanjarka),” ku iya ba aum pengarang berita ba Wisma Bapa Malaysia ditu, kemari.
Iya madah munyi nya lebuh ditanya sekalika Sarawak deka nitihka atur MKN nyema timpuh PKP dilanjarka baru di menua tu.
Berebak enggau tu Abang Johari madah, Perintah Sarawak deka selalu meri ‘input’ pasal gaya kitai di Sarawak,” ku iya.
Ku iya, MKN mega nenduka atur ngagai Perintah Sarawak dalam bejalaika chara nyaga enggau nagang pengelekai ba renggat nengeri tu.
“Aku udah nyadi chairman Aum Pengelikun Nengeri pagi tadi sereta nitihka ripot ti diterima aku puas ati iya nya operasyen PKP di Sarawak bejalai enggau manah lalu gaya ba endur di menua tu ulih dijaga,” terang iya.
Ngenang pasal nembiak Sarawak ti agi kena empas ketegal PKP di Semenanjung, ku iya, sida tau pulai ke nengeri tu kediri tang deka dikuarantin 14 hari enti sida udah datai di nengeri tu.
“Sida tau pulai kediri tang sida deka dikuarantin 14 hari di Sarawak,’ ku iya.
Kelimpah ari nya, Abang Johari madahka pengelikun di garis entara menua Sarawak enggau Kalimantan Barat Indonesia terus dijaga terit agi.
Nyemetak iya madahka nya kena nagang penama orang ari luar menua tama ke Sarawak dalam timpuh PKP tu.
“Tu nyengkaum ba kandang menua ulu baka di Long Singut, Batang Rajang enggau kitai meratika gaya di menua ke sepiak enggau kitai.
“Nya kebuah kitai numbuhka komiti mit pengelikun dikena kitai ngenegapka agi nyaga pengelikun di garis entara menua kelebih agi ‘jalai chit’,” ku iya.