KUCHING: Opis Menteri Pelajar Malaysia (KPM) enda nampung sesi besekula baru kena 15 April taja pan pentin Atur Nagang Pemindah (PKP) tembu kena 14 April nya enda dilanjarka.
Menteri KPM, Datuk Dr Mah Hang Soon madahka laban KPM bedau sedia sereta enggai ngambi risiko.
Taja pia ku iya, KPM deka ngaga pemutus ba pekara nya dalam kandang dua tau tiga hari agi.
Diberitaka KPM deka madah sekalika sesi besekula baru dibuka kena 15 April tauka enda pengudah baum enggau Menteri Besai Tan Sri Muhyiddin Yassin, Kaunsil Pengelikun Menua (MKN) sereta Opis Menteri Pengerai Malaysia (KKM).
“KPM bisi nerima langgur penemu ari apai indai enggau komuniti ngambika sekula dibuka baru dalam bulan Jun, lalu ngemendarka nembiak ke deka ngambi peresa perintah taun tu besekula baru tauka belajar nengah ‘online’,” ku iya lebuh dirandau surat berita The Borneo Post, Oriental Daily, kemari.
Ku Mah, KPM udah berandau enggau sekeda orang ke bi si pemerat ba pekara nya kenyau ari dua minggu ke udah.
Ku iya, KPM udah ngumpul langgur penemu enggau timbal ari gerempung a[pai indai enggau pengajar sentang pekara nya.
Iya meri jamin, KPM deka ngaga pemutus ti beratka pengelikun nembiak sekula enggau pengajar.
Oriental Daily mega ngambi jaku ari KPM ti madahka opis menteri nya deka ngiga chara ke pemadu manah kena mutarka penanggul ti dipelaba deka nyadi enti sesi besekula dibuka baru ba hari bulan ti deka ditetapka ila.