Anda di sini

Bala nembiak agi ulih belajar nengah program TV pelajar KPM, ‘online’ sekumbang PKP

Advertisement
 Leandro belajar nengah online ninting hari begulai enggau pengajar sekumbang PKP, ku indai iya Kathy.
BELAJAR: Leandro belajar nengah online ninting hari begulai enggau pengajar sekumbang PKP, ku indai iya Kathy.

KUCHING: Sekumbang pentin Atur Nagang Pemindah (PKP) kena nagang pengelekai igi penyakit berampit COVID-19, ke nyadi pengirau ati sekeda apai indai iya nya kelebih agi ari sukut pelajar anak sida.

Berindik ari pekara nya, bisi sekula tauka pengajar bejalaika insiatif kediri iya nya ngajar sereta meri kereja latih sekula ngagai nembiak sida sekalika nengah laman rama, aplikasyen ‘Whatsapp’ tauka nengah ‘online’.

Kelimpah ari nya mega, ti udah ngelantangka ati apai indai iya nya lebuh Opis Menteri Pelajar Malaysia (KPM) mantaika program TV pelajar nengah Radio Televisyen Malaysia (RTM) ngemendarka nembiak bulih akses ngagai utai dipelajar nengah platform alternatif kelebih agi sekumbang PKP.

Ba Kathy Unying, program belajar nengah online endang narit ati laban nembiak mit tauka nembiak sekula berasai rindang meda utai ti dibantaika maya belajar nengah chara online ke lalu bisi ilustrasyen ti begambar sereta penerang pelajar.

“Belajar enda leju laban timpuh jam ti diberi bisi tatak ngagai sekeda subjek aja lalu anak ulih diperatika apai indai lebuh belajar nengah online ,” ku iya madah ngagai Utusan Borneo, kemari.

Nitihka Kathy pia mega anak iya, Leandro Andreio Alo mega diatu suah nitihka pelajar nengah online ninting hari sereta bisi komunikasyen enggau pengajar sekula iya.

Ku iya, program pelajar nengah online mega dipeda endang manah enti nyema pengajar seruran ngemaruka saut ba latih ti diberi ngagai nembiak kelimpah meri penerang ti patut ngagai nembiak ungkup tetiap sesi belajar ti diberi.

“Ke beguna amat pengajar suah berandau enggau nembiak tauka mantu nembiak nengah sesi tanya saut sekalika nengah ‘Whatsapp’, ‘Zoom’, ‘Telegram’ tauka ‘Google Classroom’,” ku iya.

Indai ti bisi siku anak nya madah, taja pia nadai disangkal mega tu engka deka bisi pengurang ba sukut iring penuh ari pengajar ngagai nembiak sekula sida ba pengawa nyaut latih tauka chara nyaut esei ti begunaka penerang ke silik agi.

“Engka ngena chara online, bisi nembiak napi pemar nitihka pemansang pelajar ke pemadu baru laban arus internet ti kurang tauka nadai perengkaguna ti chukup,” ku iya.

Berebak enggau nya, Nurul Baizura madahka program TV Pelajar ari KPM nya manah amat sereta matak pengerindu nembiak mit belajar nengah chara ‘live’.

Ku iya, tu ulih ngangkatka tikas penyulut pelajar anak kemaya hari tu.

Nurul ke mega indai ngagai Irfan Daniel madah, ari sukut pengasi nya tepulai ngagai nembiak sekula meretika nya.

“Tu laban bisi sekeda nembiak sida engka rindu belajar nengah online laban mudah agi tang bisi mega sekeda ari nembiak nadai pengerindu laban ti rindu agi belajar terus ari pengajar,” ku iya.

Ba penemu Suzy Unying, indai Adam Royston, belajar chara interaktif ulih matak pengerindu nembiak, kelebih agi nembiak sekula primari sereta prasekula.

Ku iya tu laban grafik ti dipandangka mayuh macham chura matak pengerindu nembiak lalu sida ransing nguji pekara ti baru baka ilustrasyen grafik, video, audio enggau ke bukai.

“Tang enti dipeda ari sukut pengasi, aku ngasai engka bisi seraka ba penemu ungkup nembiak ti lemi dalam pelajar laban nadai iring enggau terus enti enda meretika sesiti topik.

“Kebuah pia, laban pengajar engka enda nemu tikas penau nembiak ke bendar ketegal ti enda betunga mua sereta berandauka strategi pelajar enggau ngemuntangka chara (PDPC) ngena chara asal,” ku iya.

Suzy madah, ari sukut belajar nengah online nembiak ti diau ba menua pesisir sereta nadai arus internet napi pemar nitihka sesi belajar sereta deka tinggal dalam pelajar.

Advertisement