SIBU: Raban nembiak ke mega peranak ari Sarawak ti belajar ba Universiti Pendidikan Sultan Idris (UPSI), Tanjung Malim, Perak, nengah gerempung Jalinan Anak Sarawak (JASA) minta perintah nengeri tu nyurungka bantu ngagai sida (nembiak UPSI ke beasal ari Sarawak) kena napi pengidup diri sekumbang timpuh Atur Nagang Pemindah (PKP) tu.
Presiden JASA Elijah Inka madah, peranak Sarawak ke belajar ba UPSI beguna amat ke perintah Sarawak mantu sereta mendingka sebana sida.
“Kami ngembuan penyampau tubuh peranak Sarawak ke pemadu mayuh entara IPTA ke bukai.
“Nya alai, enggau baruh ati kami minta perintah Sarawak nganjung sekeda bantu mata duit tauka bekal pemakai, kelebih agi ungkup nembiak ari Sarawak,” ku iya madah ngagai pengarang berita Utusan Borneo.
Berindik ari PKP ke udah dipadahka Menteri Besai Tan Sri Muhyiddin Yassin kena 18 Mac 2020 empai lama, institusyen pelajar baka universiti mega diketuka. Ke lebih agi nembiak ke beasal ari Sarawak di UPSI, gaya pengidup besesehari sida enda sama sereta napi bemacham penanggul sekumbang PKP tu.
Ambika chunto baka kelas belajar sida ditampung nyentuk 2 Jun 2020, tikit bilun dikena pulai/mansang enda ulih diguna, pemindah sida ditatak ngagai sesiti endur enggau mayuh agi penanggul ke bukai.
Nitihka pansik ti dipejalaika JASA kena 27 Mac 2020, urung 903 iku nembiak Sarawak ba UPSI ke enda mulaika diri ke rumah tauka menua, lalu penyampau nya dipelabaka tinggi agi laban UPSI ngembuan rejista nembiak ke pemadu mayuh enti dibanding enggau universiti ke bukai.
Ari penyampau tubuh ke dipansik sida nya, 32 peratus tauka 288 iku nembiak tu diau ba kolej di dalam kampus lalu 68 peratus tauka 615 iku nembiak tinggal ba luar kampus/diau di rumah suwa.
Taja pia, raban nembiak UPSI peranak Sarawak seruran nyaga diri sereta liat ati napi penguji tu. Sida mega seruran dikemataka dua iku pengelicha UPSI empu, iya nya Dr. Samsudin Suhaili ke mega Penyading Penemu JASA enggau Dr Patricia Ganing.
“Apai indai ke bisi anak belajar ba UPSI ditu, anang irau ke sida laban atur UPSI chukup manah sereta naka ulih meri bantu ngagai semua nembiak nyengkaum raban nembiak Sarawak ke diau ba dalam tauka luar kampus,” ku Dr. Patricia.
Berebak enggau nya ku Elijah, entara alternatif ke udah diatur raban JASA iya nya sida bisi betelefon ngagai sekeda YB enggau Volunteer Sarawak dikena ngulihka sukung enggau bantu nya. Raban komiti JASA enggau UPSI mega ke nyadi pengari anak Sarawak ditu mantaika sebana enggau penusah tu.
“Ngagai sesapa raban ke gerah jari sereta deka meri bantu, kita tau ngiga kami nengah media rama Facebook kami empu iya nya, ‘Jalinan Anak Sarawak UPSI - RASMI’.
“Kami seruran besampi ngagai Tuhan, ngambika penanggul penyakit Covid-19 ke ditapi menua kitai tu ulih diputar enggau lengkas, lalu pengidup kitai deka likun baka selama,” ku iya nambah.