KUCHING: Penyampau peratus nitihka pentin Atur Nagang Pemindah (PKP) naka hari ke-8 (kemari) renggat kedua di serata nengeri manggai 96.4 peratus.
Komisioner Polis Sarawak Datuk Aidi Ismail madah, nya nyata dipeda lebuh penyampau kerita enggau mensia mayuh ke pansut nadai kebuah berat bisi majak kurang.
Nya alai iya ngarapka mensia mayuh di nengeri tu terus meri kerejasama ba pengawa mutuska rentayan COVID-19.
“Penyampau ke ditangkap ninting hari ungkup timpuh 24 jam (8 pagi Hari Dua -8 pagi kemari) bisi 25 iku, iya nya kurang ari timpuh ke sama kemari ti ngerikod 35 iku ke ditangkap.
“Dikearapka mensia mayuh di nengeri tu terus nitihka pentin PKP lalu semina pansut enti bisi kebuah berat,” ku iya ba sebengkah penerang ditu, kemari.
Aidi madah, kenyau ari18 Mac nyentuk ke sehari tu, bisi 512 iku ditangkap ketegal nanjang pentin PKP.
“Ari penyampau nya, bisi 383 iku udah didawa lalu tebal agi nya ditinggang ukum jil pengelama dua minggu nyentuk ke tiga bulan sereta diukum mata duit,” ku iya.
Nyentuk Hari Dua, bisi 4,140 raban enggau pemesai polis diasuh neritka PKP ke bela dibantu 681 Raban Soldadu Malaysia (ATM), RELA (397), Angkatan Pertahanan Awam (63) enggau Polis Volunteer (PVR) bisi 79 orang.
Kelimpah ari ngempang jalai alun, raban ke gawa nya mega bejalaika pengawa matau nyengkaum nengah langit ti dipejalaika Unit Dron Pasukan Gerakan Udara (PGU) Polis Pangkalan Sarawak.