KUCHING: Berindik ari udah nagang pengawa begempuru bebala mayuh, dipelabaka nengeri tu nadai agi betapi enggau kluster baka ke nyadi sebedau tu, pia ku Menteri Dagang Temuai, Seni enggau Main Asal, Datuk Abdul Karim Rahman Hamzah.
Iya madahka diatu gaya di Sarawak agi ulih dijaga ari pengelekai COVID-19 sereta dikearapka rayat terus nitihka atur ti dipejalaika ari baruh Atur Nagang Pemindah.
"Ari penemu aku empu, aku ngasaika Sarawak agi ulih dijaga, aku pechaya kitai nadai agi betapi enggau kluster ti nyadi tauka dipeda kitai sebedau tu baka kluster tabligh enggau kluster gerija.
"Laban semua ditagang tauka enda dikemendarka betugung bebala mayuh sereta semua atur ti baka nya dititihka enda ngira dini alai di Malaysia nyengkaum di Sarawak.
"Nya alai aku pechaya kitai deka nadai agi betemu enggau penyampau ti mayuh baka tu sereta ngelekai enggau lengkas baka tu, nya kebuah kitai amat ngarapka rayat ngambika enda begempuru bala mayuh," ku iya ti mega Sapit Chairman Komiti Mutarka Penusah Ngenyit Nengeri Sarawak (JPBNS).
Abdul Karim mansutka pekara nya ba Aum Pengarang Berita COVID-19 Sarawak ti diatur ba Wisma Bapa Malaysia ditu, kemari.
"Nyema bisi orang nadai tauka mati, semina diri sebilik ke semak aja dikemendarka lalu patut nitihka semua Prosedur Operasyen Standard (SOP) baka ngena sengkabung idung enggau mulut enggau ke bukai ngambika penyakit ti bakatu enda ngelekai," ku iya.
Dulu ari nya Abdul Karim ti mega Menteri Nembiak, Lumba enggau Main madahka gaya pengelikun di Sarawak ba tikas ke agi ulih dijaga enggau penyampau tikas pengulih nitihka PKP 96.5 peratus.
Semua ejensi ti bejalai sereta neritka operasyen PKP terus bejalaika pengawa nyaga enggau matau di nengeri tu sereta bejalaika operasyen meresi ba semua kandang endur zon mirah enggau urin dikena nagang pengelekai COVID-19.
"Nyentuk sehari tu (kemari), tikas pengulih nitihka PKP iya nya 96.5 peratus.
"Kemari (ensanus) polis udah nangkap 25 iku di Sarawak laban ngelanggar PKP enggau 71 iku udah ditinggang ukum ba kort. Lalu ari penyampau nya 57 iku udah ngaku diri salah sereta bisi 16 iku dijil enggau 35 iku udah ditinggang ukum," ku iya.
Lebuh ke ngenang pasal Person Under Surveilliance (PUS) iya nya bisi 33 iku rayat Sarawak ti baru datai ari menua luar/ Semenanjung/ Sabah enggau Labuan ti nyadika penyampau bisi 318 iku dikuarantin ba Palan Kuarantin nyadi PUS.
Kelimpah ari nya ditanya pengarang berita bekaul enggau siti kes pemati ketegal COVID-19 ke nyadi ba siku orang ari Batu Kawa, iya madahka kluster kes nya agi dipansik.