KUCHING: Semua kompeni ba Zon Perdagangan Bebas Samajaya (FTZ) benung beoperasyen ba tikas minima sereta deka diperundingka nyema bisi pematut diketuka dulu sekumbang timpuh Atur Nagang Pemindah (PKP).
Menteri Muda Dagang Antarabansa enggau Industri, Teminal Industri enggau Pemansang Orang Dagang Datuk Mohd Naroden Majais madah, pekara nya dikemendarka Komiti Mutarka Penusah Ngenyit Nengeri (JPBN) Sarawak setipak enggau polisi Perintah Besai ti ngemendarka sektor E&E beoperasyen ba tikas minima.
Bisi mega kompeni dalam sektor E&E di Pulau Pinang enggau Selangor ti dikemendarka beoperasyen ba tikas minima maya timpuh PKP tu, ku iya.
“Sekeda kompeni di Samajaya FTZ ti benung beoperasyen ba tikas minima bisi nya urung 20 peratus ngagai 30 peratus, ngena syif lalu ukai bebala mayuh ba siti endur tang ba sekeda kilang ke enggi sida, lalu staf ke gawa ba opis diasuh gawa ari rumah.
“Tebal agi kompeni tu udah berengkah ngemeran enggau ngemeratka atur pengawa nagang pengelekai (COVID-19) tu sebedau PKP dipadahka. Sida udah nagang pemindah tauka pejalai staf ngagai kandang endur ti ke bisi kena rampit.
“Sekeda ari kompeni nya bisi muka Klinik Mit sida empu ti bisi lutur enggau indu misi ti ngemataka pengerai pengereja pengawa sida sereta bisi mega numbuhka komiti dikena nentuka SOP dititihka,” ku iya ba penerang berita, kemari.
Naroden madahka pekara nya kena iya nimbal Kaban Parlimen Stampin Chong Cheing Jen ti ngasuh perintah nengeri nutup kilang elektronik ba Samajaya FTZ Kuching sekumbang timpuh PKP.
Ku Naroden, kena 26 Mac Sapit Kepala Menteri ti mega Menteri Dagang Antarabansa enggau Industri, Terminal Industri enggau Pemansang Orang Dagang Datuk Amar Awang Tengah Ali Hassan ti megai tanggungpengawa nyaga Samajaya FTZ, udah ngabas lima kompeni elektronik besai ti disempulang polis, soldadu enggau sekeda ejensi meresa prosedur kompeni enggau chara dipejalaika sida kena nitihka PKP.
Kelimpah ari polis enggau Jabatan Pertahanan Awam ti deka terus matau kompeni tu ku iya, dalam timpuh ke sama kompeni tu mega dipinta ngenataika ripot ninting hari ngagai JPBN nengah Opis Menteri Dagang Antarabansa enggau Industri, Terminal Industri enggau Pemansang Orang Dagang (MINTRED).
“Naka ke diatu nadai kompeni ti diripot enda nitihka penetap ke udah diberi enggau nadai kes COVID-19 ti diripotka ba Samajaya.
“JPBN deka mansik baru status nya nyema bisi kes COVID-19 ti diripotka dalam Samajaya FTZ tauka nyema bisi ripot ti enda nitihka pinta enggau penetap ti ditetapka PKP.
“Taja pia, nyema bisi pematut nutup kilang ba Samajaya FTZ ketegal COVID-19, JPBN enggau opis menteri aku enda kakang bejalaika atur nya,” ku iya.
Kelimpah ari nya ku iya, Perintah Sarawak udah ngemendarka industri ti bekaul enggau orang bumai bekebun, orang berikan, orang bekebun bedandang besai, papan lapis enggau kayu, kompeni minyak enggau gis beoperasyen ngambika enda ngujungka semua kitai meku.
JPBN mega udah madahka kedai pekakas, kedai nyual input betanam betupi, kedai barang ganti dikemendar dibuka dua kali seminggu iya nya Hari Dua enggau Empat ari pukul 7 pagi ngagai 7 malam.