KUCHING: Individu ke bisi ‘kontak’ enggau empat raban ke bisi bekaul enggau kes COVID-19 dipinta datai beperesa enggau lengkas.
Empat raban tu iya nya Majlis Jerayawara Wawasan Ummah Gemilang Majlis Islam Sarawak (MIS) kena 10 Mac 2020 ba Dewan Suarah Kota Samarahan, kontak ngagai kluster, pengereja pengawa enggau nembiak SMK Kota Samarahan, kluster Good News Fellowship sereta individu ti semak enggau pesakit COVID-19.
Menteri Kaunsil Kandang Menua enggau Pengawa Berumah, Dato Sri Dr Sim Hui Hian nengah ‘Facebook’ iya minta sida ti bisi ‘kontak’ enggau sebarang bagi raban tu datai beperesa.
“Minta tulung kita datai ngambika dipansik enggau diperesa. Nadai stigma. Udah tentu ukai salah kita,” ku iya.
Dr Sim nambah, enggau datai kediri beperesa, kita ku iya ulih nyelamatka diri empu, diri sebilik sereta kelebih agi rayat Sarawak.
Pemadu beguna ku Dr Sim, nya ulih mantu ngetuka pengelekai COVID-19 di Sarawak ari nuju ngagai gaya ti nyadi ti Itali, Sepanyol, United Kingdom tauka Amerika Syarikat.
“Tetiap iku ngembuan tanggungpengawa diri empu lalu pejalaika pengawa kita enggau bebendar,” ku Dr Sim.
Berebak enggau nya, Opis Pengerai Bagi Menua Samarahan ba siti notis pemadah ti dikunsi Dr Sim nengah ‘Facebook’ iya minta sida ti bisi kontak enggau empat raban tu datai beperesa COVID-19 enggau lengkas.
Pengawa meresa COVID-19 tu tau dipejalaika di Dewan Suarah Kota Samarahan ari pukul 8.30 pagi ngagai 11 pagi enggau 1 ngalih hari ngagai 3 lemai ninting Hari Satu ngagai Hari Lima nyengkaum Hari Enam enggau Hari Minggu berengkah 6 April 2020.
Penerang ke silik enggau sebarang tanya tau betelefon ngagai Opis Pengerai Bagi Menua Samarahan ba lumur 082-672101.