MIRI: Bisi 161 rumah panjai ti bisi urung 3,900 ruang bilik di Beluru enggau Tinjar, Baram udah nerima bantu pemakai kena Hari Minggu.
Kaban Kunsil Nengeri Marudi Datu Dr Penguang Manggil nengah ‘Facebook’ iya madahka 3,900 ruang bilik nya raban ti kepenudi nerima bantu pemakai ke guna besesehari nya ari baruh sitak iya.
“Renggat kepenudi pengawa nyadung pemakai nya mungkur 161 rumah panjai ti bisi urung 3,900 ruang bilik udah dipejalaika ba balai komuniti Beluru enggau Dewan Anthony di Lapok kena Hari Minggu nyin tadi.
“Bantu pemakai tu disadung ngagai semua genturung pendiau ari baruh sitak Marudi enda ngira bida ari sukut politik,” ku iya.
Nitihku Penguang, bisi 6,772 ruang bilik ari baruh sitak iya nerima bantu pemakai nya, ti udah disadung kenyau 3 April nyin tadi.
“Aku meri terima kasih ngagai semua ketuai komuniti enggau sesapa aja ti udah mantu nyadung bantu pemakai ke beguna nya ngagai komuniti ari baruh sitak aku,” ku iya madah nengah ‘Facebook’ iya.