Anda di sini

Bekal pemakai chukup sekumbang PKP tu

Advertisement

KUCHING: Rayat Sarawak anang irauka sentang bekal pemakai laban dijamin chukup sekumbang Atur Nagang Pemindah (PKP) tu.

Kaban Komiti Rentayan Pemakai Maya COVID-19, Datuk Mohd Naroden Majais madah, jamin nya diberi Opis Menteri Dagang Dalam Menua enggau Pekara Penguna (KPDNHEP) ti megai tanggungpengawa mekalka pemakai di Sarawak.

“KPDNHEP madah ngagai kami ke alai bekal barang pemakai nengeri tu mengkang ulih dijaga sereta chukup ungkup tetiap bagi menua, pelilih menua enggau kandang genturung pendiau sereta menua pesisir.

“Nya alai, semua serak mensia mayuh sekalika di mengeri tauka di menua pesisir dilalau anang irau sekumbang timpuh PKP ti kena mutarka penanggul penyakit COVID-19,” ku iya nengah aplikasyen WhatsApp kemari.

Menteri Muda Pemansang Dagang Antarabansa enggau Industri, Teminal Industri enggau Pemansang Orang Dagang nya madah, rayat patut nemu Sarawak bisi dua sistem mekal enggau nyual ba 800 buah palan nyual (POS) di menua pesisir.

Palan nyual tu ku Naroden, baka kedai runchit ti nyual barang ke diguna belama ke berejista ari baruh KPDNHEP enggau nganjung barang ti dijaga tu nengah ejensi nya belama nitihka peminta dalam sesiti kandang menua nya.  

“Palan nyual meli barang nya ari pemurung ke bisi ba pasar ke besemak. Ambika chunto, baka Genturung Pendiau Nanga Merit dalam bagi menua Kapit bisi tiga POS lalu semua barang sida dianjung ke tuju ‘diisi baru’ bala ke nyadung nitihka perintah ejensi nya ngambika mensia mayuh ba kandang menua nya ulih meli barang ke diguna sida,” ku iya.

Kelimpah ari nya ku Naroden, bisi mega kedai runchit ke ukai ari baruh kemata KPDNHEP ke alai sida meli barang terus ari orang ke nyadung ngagai sida.

“Ungkup barang bantu ‘Sarawakku Sayang’, Perintah Gabungan Parti Sarawak (GPS) ari baruh iring Kepala Menteri Datuk Patinggi Abang Johari Tun Abang Haji Openg udah ngungkupka RM200,000 ke tetiap 82 sitak Kunsil Nengeri (DUN) nengah Akaun Komiti Penusah Ngenyit Bagi Menua (JBB).

“Nya dikena barang pemakai ninting hari ungkup semua sitak DUN di serata nengeri tu,” tambah iya.

Advertisement