Anda di sini

JPBN Sibu numbuhka ‘WhatApps Center Komiti’ dikena ngemudahka peranak minta bantu

Advertisement
DR ANNUAR
DR ANNUAR

SIBU: ‘WhatApps Center’ ti ditumbuhka Komiti Mutarka Penusah Ngenyit Nengeri (JPBN) Bagi Menua Sibu dikena ngemuntangka peranak ba kandang menua tu ngerejista diri minta bantu ngambika enda putus bekal pemakai ketegal Atur Nagang Pemindah (PKP), udah berengkah beoperasyen kemari. 

Menteri Muda Pelajar, Sains enggau Pansik Teknologi Dr Annuar Rapa’ee, mantaika pekara nya ba media rama ‘Facebook’ iya empu (Dr Annuar Rapaee) kemari.

Ku iya, ngagai sesapa ti begunaka bantu, kelebih agi raban ke putus bekal pemakai tau nganjung data diri nengah ‘WhatsApp Center Komiti’ berengkah ari sehari tu (kemari) ngagai lumur 011-59831495.

“Entara data ke patut direjista sida iya nya baka nama, kereja bini, lumur IC, penyampau tubuh diri sebilik, lumur telefon (Bini), alamat rumah, nama laki, kereja laki, lumur IC, lumur telefon (Laki).

“Ungkup raban ke ngerejista diri nengah WhatApps tu, lima bengkah Palan Magi Pemakai di ditumbuhka ba Sibu deka nganjung bantu nya terus ke rumah penerima,” ku iya.

Dr Annuar ke mega Menteri Muda Pengerai Mensia Mayuh madahka, bala ti ngerejista diri ke enda ngisi data enggau penuh baka ti udah dipinta, peminta sida enda diatur.

Nangkanka tu, ku iya, pengawa ngerejista diri nengah ‘WhatsApp Center’ tu semina diterima ari pukul 9.00 pagi nyentuk 12.00 tengah hari, lalu pom ngerejista diri nengah WhatsApp aja dikemendarka. Enti ngena chara berandau tauka betelefon, endang enda diterima. 

“Sida ke patut nerima bantu tu iya nya raban pekereja ke begaji hari, raban ‘asnaf’ ke putus bekal pemakai enggau kes penusah ngenyit aja,” ku iya.

Berebak enggau nya, ungkup peranak rumah panjai ba pelilih menua pesisir Sibu, ku iya, sida enda ibuh ngerejista diri nengah ‘Whatapps Center’ tu laban bantu deka dianjung terus ngagai semua rumah panjai enggau genturung pendiau di menua pesisir.

“Kami mega napi isu logistik dikena nganjung bantu ngagai kandang menua pesisir. Nya alai, kami netapka diri empu nganjung bantu tu ngagai semua peranak rumah panjai enggau genturung pendiau ba kandang menua pesisir,” ku iya.

Kelimpah ari tu, Dr Annuar mega madahka, berengkah ari sehari tu Parti Pesaka Bumiputera Bersatu (PBB) enggau Opis Servis Nangka ukai palan endur meri bantu agi. 

“Tang kami semina nyadi pemantu ngagai JPBS,” ku iya.

  • oleh
  • Advertisement