MIRI: Komiti Mutarka Penusah Ngenyit Nengeri (JPBN) dipinta mantaika garis lalau ngagihka bantu pemeri ngagai mensia mayuh nyadika chara dikena nagang pengelekai igi penyakit berampit COVID-19.
Sekretari Pakatan Harapan (PH) Sarawak Senator Alan Ling madah, garis lalau nentuka pemeri disadung enggau manah agi ti mega ngemeratka seraka sosial entara orang ke meri enggau penerima.
“Maya Atur Nagang Pemindah (PKP) tu, mayuh orang datai nyuaka bantu ngagai raban ti begunaka bantu nya. JPBN mesti ngeluarka garis lalau tauka Prosedur Operasyen Standard (SOP) laban agi mayuh nadai diterangka enggau silik sentang chara meri bantu dalam timpuh tu,” ku iya nerang.
Alan madah, palan ngumpul bantu pemeri mega mesti dipadah ngambika bantu ulih digumpul lalu dibagi sama bela ngagai penerima ba tetiap kandang menua ti dipansik.
Kelimpah ari palan, mensia mayuh patut dipadah enggau jam sereta pemesai tauka pengereja pengawa ti meri bantu tu ngambika atur enggau pengawa nyadung pemakai sistematik agi.
Berebak enggau nya, iya muji penyiru peranak Miri ti mayuh meri bantu kelebih agi barang pemakai ngagai raban ti begunaka bantu ba ditu, ti pemadu tekeruga ketegal PKP.
Pengeransing sida bela besaup sekumbang timpuh napi pemar tu beguna amat nentuka pengelantang pendiau sida ti nadai benasit manah nya terus dijaga.
Kena 31 Mac nyin tadi, Alan ngatur aktiviti nyadung bantu pemakai ngagai 100 ruang bilik ditu nyengkaum sida ti diau ba rumah nadai pemendar.
Orang ti dikemeratka iya nya Orang Timpang Pendiau sereta ruang bilik tunggal.
“Aku beterima kasih sereta meri tanda basa ngagai sida ti melanja udah mantu mujurka aktiviti meri bantu tu. Kerejasama semua nyadika pengering ngagai kami ngelaban pengelekai virus tu,” ku Alan nerang.