KUCHING: Bilik enggau agu kediri iya nya entara pekara ti patut ba palan kuarantin sementara ungkup individu ti tama ke Sarawak dalam pengawa nagang pengele-kai COVID-19.
Menteri Dagang Temuai, Seni, Main Asal, Raban Nembiak, Lumba enggau Main Datuk Abdul Karim Rahman Hamzah madah bisi beberapa pekara ti dikemerat ungkup palan kuarantin ditumbuhka lalu enda semua komiti penusah ngenyit bagi menua tu ngena hotel nyadi palan kuarantin.
Ba mengeri ku iya, perintah nengeri udah nyadika Komplek Raban Nembiak, Lumba enggau Main nyadi palan peresa COVID-19 enggau kuarantin.
“Kami deka meri awak ngagai raban komiti mutarka penusah ngenyit bagi menua nya empu meri pemutus laban bisi ke guna khas ba tuju nya.
“Aku mega dipadah ke alai enda semua komiti mutarka penusah ngenyit ngena hotel nyadi palan kuarantin sida. Bisi mega ngena palan nembiak enggau bisi ngena buding,” ku iya madah maya ditelefon Borneo Post.
Iya dipinta meri penerang sentang peminta ari luyar Alex Ling ti dekaka perintah berundingka ngena hotel dua bintang nyadi palan kuarantin dibanding tiga ngagai lima bintang.
Alex bepenemu hotel tiga ngagai lima bintang ti ngena sistem ‘centralized aircond’ ukai pilih pemadu engkeman nyadi palan kuarantin.
Abdul Karim nambah, opis bekuasa napi pemar mansik palan ke manah nyadi palan kuarantin.
Nya kebuah, rayat patut nemu meretika agi gaya tu enggau ukai semina bejaku jai ngagai sida.
“Endang nyamai bejaku ke orang. Tang sida ti dikuarantin pan bedau disahka positif COVID-19. Kuarantin nya kedeka perintah lalu ari sukut statistik nyauka semua sida tu negatif pengudah 14 hari kuarantin,” ku iya nambah.
Alex ba penerang iya madah, penanggul hotel iya nya sistem ‘centralized aircond’ ke alai angin ari tetiap bilik bepusin ngagai semua bilik pengudah nengah tiub ke meri nya chelap.
“Nuan ulih mikir, virus COVID-19 ari individu ti kena rampit ulih ngelekai lalu ulih ngerampit semua begunan tauka hotel.
“Nya kebuah kapal ngembuan tikas ti tinggi endur penyakit tu berampit,” ku iya nerangka ripot berita bedau lama udah ke alai tujuh hotel di Sarawak nyambut peminta perintah nyadika hotel sida palan kuarantin.