BINTULU: Siku pekebun mit ba bagi menua tu begunaka bantu laban ti bepanggai ba duit galau kediri dikena meli barang ti diguna besehari-hari, kelebih agi maya napi isu pengelekai COVID-19 tu, ketegal asil bejual kebun iya baka sayur balat tekeruga sekumbang timpuh Atur Nagang Pemindah (PKP) kenyau 18 Mac tu tadi.
PKP ti dipejalaika perintah nyentuk 14 April 2020 dikena nagang pengelekai igi penyakit berampit Coronavirus (COVID-19) lalu pekebun nya entara ti ngasi sereta nitihka PKP nya.
Taja pia pekebun mit tu ti benama AjiraIskandar Awang Jimat, 41, nya madah, diatu iya semina bepanggai ngagai duit galau iya ti bisi dikena napi hari semanjai PKP tu dalam neruska pengidup.
Iya ti bekebun mit sereta bepanggai penuh enggau penatai pemisi ari asil kebun sayur ti digelar ‘My Little Home Garden’ kenyau dua taun ti udah sebedau tu bulih penatai pemisi urung RM3,000 nyentuk RM4,000 sebulan bepelasarka dua minggu maya sayur nya tau diambi sereta nanam baru.
Berindik ari nya, ku iya, timpuh ngambi utai tanam enggau sayur iya lebuh ti udah patut diempa diatu napi penanggul berindik ari pemurung ari luar Bintulu enda ulih ngambi sayur ketegal PKP lalu iya irauka sayur nya enda ulih dijual ngagai mensia mayuh enti udah jai.
“Asil sereta penguntung bejual iya balat tekeruga. Aku semina teulihka asil urung RM180 aja. Lalu ketegal ti enda dijual sereta irau sayur ti diambi nya jai, aku meri sekeda asil kebun nya ngagai orang ke semak rumah enggau diri sebilik,” ku iya.
Bansa sayur ke ditanam nyengkaum sayur amoi, ensabi pait, ensabi, kangkung, retak, genuk lembu, chabi padi, jagung, paung buah sereta bungai.
“Sekumbang PKP diteritka, aku napi pemar ngelakuka asil utai tanam sereta mayuh sayur ti ditanam udah ngelui timpuh ti patut diambi. Pekara ti pemadu balat iya nya pemurung enda ulih ngambi nya berindik nadai pedaja mit ti sanggup napi risiko meli laban irau nadai ulih dijual baru,” ku iya madah lebuh dikerandau Utusan Borneo.
“Dikena mutarka penanggul nya aku ngambi inisiatif bejalaika pengawa nengah ‘on-line’ iya nya ‘Cash On Delivery’ (COD) tang bisi tatak laban PKP lalu untung ari bejual amat kurang sereta nyauka nadai orang meli,” ku iya ti bekebun mit ba genturung pendiau iya ba Rancangan Perumahan Rakyat (RPR) Kidurong Fasa 4 Bintulu.
“Diatu aku semina bepanggai ba duit galau ti bisi aja sereta pengawa nyual tikas mit baka paung bungai sereta paung buah,” ku iya ti bisi tiga iku anak, siku udah gawa lalu dua iku agi besekula ba sekula primari sereta nampung pelajar ba Institusyen Pelajar Tinggi Perintah (IPTA).
Beserimbai enggau nya, iya madahka diri udah berandau enggau Gerempung Orang Bumai Kandang Endur (PPK) Bintulu tang gerempung nya mekuh ba orang ti bekebun bedandang besai ngambika ulih dibekal sereta dianjung ke pasar tamu besai di Bintulu tang aku semina ulih mekal ungkup 20 kilogram (kg) ngagai 30 kg sehari lalu diatu sayur ti ditanam mayuh udah tuai sereta udah ngelui maya ti patut diambi.
AjiraIskandar madah, gaya kediatu amat mar nitihka peminta nya taja pan sayur ke ditanam nya ngemeranka jamin kualiti, nadai ngena rachun kimia sereta seratus-peratus nadai ngena rachun indu utai dikena nentuka tikas pengelikun pemakai tang iya ngarap raban perintah tauka ejensi ti bekaul ulih mantu iya mutarka penanggul ti ditapi iya tu.
Nitih ku iya, penemu bekaul enggau chara nanam sayur nadai ngena rachun ditemu iya ari nembiak Universiti Putra Malaysia (UPM) ke kala nemuai seraya belajar ba kebun iya sebedau tu.
Lebuh berengkah bejalaika projek nanam sayur nya AjiraIskandar madah, dalam sebulan iya ulih mekal sereta nyual 300 ngagai 450 kg sayur ungkup dua kali musim ngambi iya nya penguntung dipelaba dalam RM3,000 ngagai RM4,500 sebulan.
“Kebun ti dikemansangka iya ngena duit diri empu sereta sebedau tu kala ngaga keretas kereja deka minta bantu tang enda bulih,” ku iya.
“Diatu mayuh sayur ti ditanam aku udah tuai sereta jai lalu bakut nya patut dikerumbak baru lalu nganti dua minggu agi baru bakut nya ulih ditaburka benih sereta ditanam baru ungkup renggat dua minggu ngambika pusin nya nemban (interval) ari mula ngaga bakut nyentukka sayur ulih diambi, pengawa ngambi sayur tu digaga dua kali sebulan.
“Betanam sayur diatu nadai ulih diatur baka ngelamatu kelimpah ngena rachun indu utai sereta rachun daun (ulat daun), tebal agi sayur ti dijual ba pasar ngena rachun nya,” ku iya.
Tang ku AjiraIskandar madah, iya andal agi ngemeranka pengawa betanam ti enda ngena rachun indu utai enggau ke bukai dikena nentuka pengelikun penguna lalu tu endang udah juluk iya ti ukai semina deka ngulihka penguntung tang mega nentuka pengelikun barang pemakai.
“Sekumbang PKP ti udah manggai dua minggu lalu Interval keterubah nadai entu manah sereta galak ungkup sayur ke ditanam ketegal asil betanam nadai ulih diambi seratus-peratus, nyadika chunto lebuh aku ngaga Interval kedua nya tekeruga ari sukut musim nya diambi sereta empas ari pemurung nadai ulih ngambi asil tanam nya ngujungka mai pengerugi ari sukut duit sereta pengawa.
“Enti gawa bulih gaji bulan engka nadai penanggul tang aku semina bepanggai enggau pengawa nyual sayur ti ditanam aku sereta asil tanam aku mega berubah ninting hari,” ku iya seraya nambah pemesai kebun iya dipelaba dalam 140 kaki nengah buka 60 kaki.
Ba pekara ke bukai ku iya, iya enda ngetu naka nya aja tang udah merambu deka nanam mayuh macham bansa sayur bukai jemah ila baka retak enggau sayur buah lalu enggau PKP ti dilanjarka tu mih entara pemar besai ti mesti ditapi iya dikena nentuka sayur ti ditanam nya tan ngambika penatai pemisi enda terus putus.
“Naka tu aku udah rugi urung RM2,000 ngagai RM3,000,” ku iya diintebiu nengah ‘online’ ditu, bedau lama.