SIBU: Serakup Hotel Pampang Sarawak meri penemu ngambika semua orang luar ke tama ngagai Sarawak patut diperesa raban Opis Pengerai enggau silik sebedau sida dikuarantin ba hotel.
Chairman serakup nya Johnny Wong madahka, pengawa tu dikena nyeliahka sebarang komplikasi ti dipelabaka bisi pansut pengudah nya.
Nengah pengawa tu mega, Wong pechayaka perambu tu ulih nyaga pengelikun raban pengatur enggau pekereja hotel, kelimpah ti ngelalau sida ngambika bejejaga ari kena rampit penyakit COVID-19.
Dulu ari nya, Sapit Kepala Menteri Datuk Amar Douglas Uggah Embas madahka ba pengawa aum media di Wisma Bapa Malaysia di Kuching ensanus, semua bala temuai ke tama ngagai Sarawak sekalika nengah jalai darat, langit enggau tasik deka dikuarantin sepengelama 14 hari ba palan kuarantin empu berengkah ari 5 April (sehari tu).
Berebak enggau tu, nitih ku Uggah, Komiti Mutarka Penusah Ngenyit Nengeri Sarawak (JPBNS) diatu benung ngiga hotel dalam kandang nengeri tu ke ulih diatur nyadi palan kuarantin.
Nambahka nya ku iya, JPBNS udah tetemu sereta milih siti dua hotel lalu sida patut nentuka palan nya chukup (ungkup orang ke dikuarantin) endur diau. Pia mega, perintah deka mayar ungkus palan tu sepengelama dua minggu ngagai hotel ke dipilih nya.
Sentang pekara tu, Wong bejaku madahka: “Aku udah dipadah bekaul enggau pekara tu, tang raban pengatur hotel patut bejejimat lebuh bejalaika pengawa nya, kelebih agi orang ti dikuarantin ba hotel nya datai ari luar Malaysia, endang bisi risiko enti bisi ba palan nya. Atur ke terit dikena nyaga endur nya patut dipejalaika. Raban pekereja ke ngatur patut bejejaga,”.
“Dikena nyeliahka komplikasi, semua raban ke pulai ari luar tauka dalam menua Malaysia, patut diperesa bala Opis Pengerai sebedau sida dikuarantin dalam hotel,” ku iya.
Ku iya, tu mih chara ke pemadu manah enti Opis Pengerai mansik status pengerai bala temuai nya, lalu dikena nyaga pengelikun raban pengatur hotel.
“Enti enda pia, semua raban pengatur enggau pekereja hotel deka irau,” ku iya nambah.