SARIKEI: Bisi 23,660 Ketuai Ruang Bilik (KIR) ari bagi menua Sarikei deka nerima pakej barang pemakai ti diberi Komiti Mutarka Penusah Ngenyit (JPB) Bagi Menua Sarikei.
Chairman Komiti Mutarka Penusah Ngenyit (COVID-19) Bagi Menua Sarikei, Datu Len Talif Salleh madah, pengawa nyadung barang pemakai nya deka diberi nengah pengari ari sitak Kunsil Nengeri (DUN) endur nya empu.
“Tiap pakej barang pemakai tu diagih ti beungkus RM50 lalu entara barang ti deka diberi ngagai KIR iya nya baka berau, telu, minyak sumai enggau barang ke bukai.
“Kami ngarap tetiap pakej ke diberi tu ulih ngelempungka tating penusah enggau nangkup guna besesehari sida ke nerima nya semanjai timpuh Atur Nagang Pemindah (PKP) tu dipejalaika.
“Rayat enda patut irau sentang nganjung pakej barang tu laban nya deka dianjung terus ngagai palan iya nya rumah panjai enggau genturung pendiau ke udah dalam rintai nyadi penerima bantu tu,” ku iya.
Len madah munyi nya ngagai media maya Pengawa Nyuaka Bantu Pemakai Bagi Menua Sarikei ti udah diatur ba Dewan Opis Menteri Nembiak, Lumba enggau Main Sarawak Bagi Menua Sarikei, kemari.
Sama bisi datai ba pengerami tu iya nya Kaban Kunsil Nengeri (ADUN) Pakan, Tan Sri William Mawan Ikom, ADUN Meradong, Datuk Kuong Hiing enggau Residen Bagi Menua Sarikei, Felicia Tan Ya Hua.
Ku Len, keterubah pengawa nyadung pakej bantu pemakai tu deka dipejalaika berenggat.
“Diatu, pakej tu deka diagih ngagai palan servis komuniti ke bisi ba sesebuah DUN sebedau barang pemakai tu diberi ngagai komuniti.
“Nya alai, kami ngarapka ketuai komuniti, ketuai bansa enggau tuai rumah ulih bejalaika tanggungpengawa dalam pekara tu lalu seruran betanya enggau palan servis ba sitak DUN diri empu ngambika nemu sentang status pengawa nyadung pakej bantu pemakai tu.
“Kami deka seruran nentuka pengawa ngagihka bantu pemakai tu dipejalaika enggau mujur sereta nentuka nadai siku pan ke tinggal. Nya kebuah, kami ngarap komuniti ari renggat baruh meri sukung moral ngagai raban kami semanjai pengawa nyadung bantu tu dipejalaika ila ngambika terus datai ngagai komuniti,” ku Len.
Berebak enggau nya, Len mega ngansak komuniti ngambika nitih PKP ti udah diteritka kenyau 18 Mac tu tadi, dikena nentuka pengelekai virus COVID-19 ulih diketuka.
“Tanka momentum dikena nentuka beberapa pelilih ba bagi menua tu nyadi zon gadung sereta nadai dirampit COVID-19 lalu titih PKP maya diatu udah nyapai tikas 98 peratus rayat nitihka atur nya,” ku Len baru.
Ba pengawa nyadung renggat keterubah tu, bisi 924 genturung pendiau enggau rumah panjai ari bagi menua Sarikei udah dirintai nyadi penerima ti mungkur ungkus sepenyampau RM1,183,000.