SRI AMAN: Bisi 1,126 ketuai isi rumah (KIR) ba kandang menua Bukit Balau, Semulong Engkeranji, Munggu Sawa dalam sitak Kunsil Nengeri Bukit Begunan nerima bantu bakul pemakai ari Palan Servis Pengari Rayat DUN Bukit Begunan ditu, ensanus.
Berebak enggau nya, 3,088 agi KIR ba kandang menua ke sama deka nerima bantu tu dalam timpuh ke semak.
Bakul pemakai ti diberi ngagai komuniti ba sitak Bukit Begunan iya nya bantu ti diberi perintah nengeri nengah Palan Servis Pengari Rayat.
Tuju tu dikena mantu ngelempungka tating penusah rayat napi pengelekai COVID-19 ti benung nyadi ba menua kitai.
Bantu tu ari sukut barang pemakai baka berau, minyak sumai enggau ke bukai nya dikearap ulih ngelempungka penusah rayat.
Dulu agi ari tu, pengawa nyadung bantu pemakai tu dikemujurka dua iku ti ngarika Kaban Kunsil Nengeri Bukit Begunan Datuk Mong Dagang iya nya Whelthon Lumpoi enggau Jesi Bintoh.