KUCHING: Berengkah sehari tu (3 April 2020), pemendar mindah entara pelilih menua tauka dalam pelilih menua nya patut dipinta ba balai polis ke semak, pia ku Sapit Kepala Menteri, Datuk Amar Douglas Uggah Embas.
"Peminta ti udah dikemendarka ari Opis Pelilih Menua sebedau tu (sebedau 2 April) enda tau enda disahka baru ba opis polis ke semak," ku iya.
Uggah ti mega Chairman Komiti Mutarka Penusah Ngenyit Nengeri (JPBN) Sarawak madahka atur baru nya ba Aum Pengarang Berita COVID-19 Sarawak di Wisma Bapa Malaysia ditu, kemari.
Ku iya, belalauka Akta Pencegahan dan Pengawalan Penyakit Berjangkit 1988 : (Peraturan-Peraturan Pencegahan dan pengawalan Berjangkit : Langkah-Langkah di Dalam Kawasan Tempatan Jangkitan), Seksyen 4 (1) nyema siku orang mindah ari siti endur ngagai endur bukai di dalam kandang endur berampit tauka ari siti endur ngagai kandang endur berampit ke bukai, keterubah, meli pemakai, barang ke dikena tiap hari, ubat, pemindah iya nya semina ke siti endur di dalam radius ti enda lebih 10 kilometer ari endur diau, tauka ke siti endur ke pemadu semak enggau endur diau, enggau iya enda ulih disempulang orang bukai, kelimpah ari nyema bisi kebuah ke enda ulih diseliahka.
Kedua belalauka akta nya, ku iya, deka berubat, pemindah semina ke siti endur di dalam radius ti enda ngelui 10 kilometer ari endur diau, tauka ngelawa siti endur siti endur ke semak endur diau, enggau ulih disempulang orang bukai nyem bisi pematut.
"Taja pia, ungkup kes di Sarawak, penetap udah ditenduka ba kandang menua pesisir enggau pemendar patut dipinta ba balai polis ke semak.
"10 kilometer ba mengeri tu nadai penanggul, nya alai pagi tadi kami udah baum JPBN Sarawak , kami mantaika isu tu ngagai Kepala Polis Sarawak iya nya ungkup peranak di menua pesisir atur nya patut ulih ditentuka.
"Laban kitai meda rumah panjai (ambika chunto) ari rumah panjai aku nadai klinik ke semak dalam 10 kilometer, pia mega ke bukai. Lalu nya alai Kepala Polis udah setuju ba sekeda endur atur tu deka ditenduka senetang pekara nya," ku iya.
Kelimpah ari nya Uggah madahka berengkah 5 April 220 atur kuarantin ngagai barang sapa ke datai ke Sarawak deka dipejalai sereta diteritka.
"Berengkah 5 April 2020 (Hari Minggu), barang sapa ti datai sekalika nengah jalai darat, langit tauka tasik ke Sarawak deka diengkah dulu ba Palan Kuarantin pengelama 14 hari ba endur sida ke datai.
"Ambika chunto enti datai nengah Miri deka di kuarantin ba Palan Kuarantin Miri, ukai kuarantin ba rumah," ku iya.
Bisi ba aum pengarang berita nya Menteri Kaunsil Kandang menua enggau Pengawa Berumah Dato Sri Dr Sim Kui Hian, Menteri Muda ba Opis Kepala Menteri (Pekara Korporat enggau UKAS) Abdullah Saidol, Direktor Opis Pengerai Nengeri Sarawak Dr Chin Zin Hing.