KUCHING: Presiden Parti Sarawak Bersatu (PSB) Dato Sri Wong Soon Koh minta ngambika Bajet Tambah dipejuraika ba Aum Kunsil Negeri ti (DUN) nitihka patut diatur kena 13 April tu.
Ku iya, Kepala Menteri Datuk Patinggi Abang Johari Tun Openg patut bejuraika bajet tambah enggau teratur dikena nampung ‘pakej rangsangan’ ti dibantaika berindik ari penyakit COVID-19 diatu.
“Aku ke nyadi ex-Menteri Wang Kedua mega minta kepala menteri kitai bejuraika Bajet Tambah ba aum DUN April tu sentang atur belanja nengeri.
“Kepala menteri mesti bejuraika belanja tambah tu enggau teratur nyengkam ti mantaika ngena RM1.15 bilion (Pakej Bantu Khas Sarawakku Sayang) enggau RM16.4 juta deka mekalka pemakai sekumbang COVID1-19,” ku iya ba aum media ditu,kemari.
Ku Wong, pekara ti dibantaika iya nya mungkur lebih RM2 bilion nya kebuah patut dipejurai enggau teratur nengah bajet tambahngambika dikemendarka DUN.
Taja pia, iya melabaka DUN ti deka diatur kena 13 April t engka deka dikinsil ketegal Atur Nagang Pemindah (PKP) ti udah dilanjarka nyentuk 14 April.
Iya berebak enggau nya, iya muji Pakej Bantu Khas Sarawakku Sayang ke sepenyampau RM1.15 bilion nya atur lengkas perintah nengeri dikena mantu rayat Sarawak maya napi COVID-19.
“Kelimpah ari nya, kena 30 Mac tu tadi, Sapit Kepala Menteri (Datuk Amar Awang Tengah Ali Hasan) mega bisi mantaika ungkup belanja RM16.4 juta dikena mekalka pemakai berindik ari PKP kelebih agi ngagai rayat di menua pesisir.
“Tu siti atur ke manah amat lalu aku ngarapka pengawa ngagihka nya dikejampatka kelebih agi ngagai rayat menua pesisir kitai ti amat begunaka bantu,” ku iya.
Iya meri langgur penemu chara ke pemadu manah kena ngagihka bantu pemakai iya nya nengah pengari rayat ba sitak sida empu, laban nya dipeda ulih jampat agi.
Ku iya, pengari rayat bisi mayuh organisasyen nyengkaum ketuai ba renggat nembiak redak, palan servis enggau ketuai parti ba sitak sida empu.
“Taja pia dalam pekara tu, aku enda nemu sekalika pengari rayat ari luar Gabungan Parti Sarawak (GPS) bisi nerima ungkup kena ngagihka pemakai tu, tang aku empu nyentuk ke diatu bedau nerima sebarang ungkup nya.
“Tang aku udah ngambi inisiatif diri empu nganjung pemakai ngagai rayat dalam sitak Bawang Assan berengkah ari kemari (Hari Tiga),” ku iya ke nyadi Kaban Kunsil Nengeri Bawang Assan.
Ku Wong, dalam DUN Bawang Assan bisi 130 buah rumah panjai ti dianggarka bisi urung 1,600 ruang bilik.
Kelimpah ari nya, iya mega ngagihka bantu ke sama ngagai 1,700 ruang bilik China di menua pesisir dalam DUN Bawang Assan.