Anda di sini

Uggah: 95 peratus rayat Sarawak ngasika PKP

Advertisement

KUCHING: Dalam timpuh renggat keterubah (18 - 31 Mac 2020) Atur Nagang Pemindah (PKP) dipejalaika kena nagang pengelekai COVID-19, sepenyampau 95 peratus rayat Sarawak udah nitihka timpuh nya.

Sapit Kepala Menteri, Datuk Amar Douglas Uggah Embas madah, penyampau peratus nya nitihka ripot ke udah digaga polis, lalu patut ulih dikemanahka agi.

Iya ti nyadi Chairman Komiti Mutarka Penusah Ngenyit Nengeri (JPBN) Sarawak madah, ensanus polis udah nangkap 36 iku di Sarawak laban ti ngelanggar PKP, lalu bisi 67 iku udah dituduh di kort kena 31 Mac 2020.

“Ba semua gaya di Sarawak agi likun enggau agi ulih dijaga. Tikas nitihka Atur Nagang pemindah (PKP) di nengeri tu iya nya 95 peratus.

“Tikas nitihka PKP tu patut dikemanahka agi nengah nambahka pengawa matau enggau nyaga kelebih agi ba kandang endur ti dipadahka zon mirah.

“Komiti Mutarka Penusah Ngenyit sehari tu udah ngaga pemutus deka neruska gerah ti udah dipansutka sebedau tu,” ku iya ba Aum Pengarang berita COVID-19 Sarawak ti diatur ba Wisma Bapa Malaysia, ditu, kemari.

Nambahka nya Uggah madahka Kaunsil Pengelikun Menua ti bechairmanka YAB Menteri Besai ensanus udah nerangka Sarawak dibagi ngagai tiga (3) zon.

Ku iya, tiga zon iya nya zon mirah ti ngerikod kes positif lebih ari 41, jingga (kes ari 1 ngagai 40)  enggau zon gadung iya nya nadai kes.

“(Naka ke diatu)Zon mirah iya nya Pelilih Menua Kuching bisi 118 kes positif.

“Zon kalas iya nya Pelilih Menua Kota Samarahan bisi 20 kes, Simunjan (1), Serian (4), Sri Aman (1), Betong (9), Sarikei (6), Sibu (4), Mukah (1), Matu (1) enggau Bintulu (5), Miri (11) limbang (6) enggau Lawas bisi siti (1) kes.

“Aku ti mantaika tu ngambika mensia mayuh ba pelilih menua ti dalam kategori zon gadung awak ke ulih terus ngetanka status nya. Nya kebuah kitai neritka atur pemindah ari pelilih menua ke pelilih menua,”  ku iya seraya pelilih menua ke bukai naka ke diatu nadai kes positif.

Sekali agi, iya ngelalau mensia mayuh anang pulai ke menua maya PKP tu, laban enti pulai nya ulih ngelekaika virus tu di menua din.

“Pemindah mensia mayuh entara pelilih menua semina dikemendarka ungkup kes baka bejalaika pengawa rasmi,  pengereja pengawa ba servis ke pemadu beguna, pemati diri sebilik ke semak, diri sebilik sakit raya enggau bisi beperesa pengerai,” ku iya.

Ba aum pengarang berita nya, Uggah disempulang Menteri Kaunsil Kandang Menua enggau Pengawa Berumah, Dato Sri Dr Sim Kui Hian.

  • oleh
  • Advertisement