KUCHING: Sarawak kemari ngerikodka 32 kes positif baru COVID-19, lalu tu penyampau ke pemadu mayuh ti dirikodka naka ke diatu.
Sapit Kepala Menteri, Datuk Amar Douglas Uggah Embas madah, ditambahka enggau penyampau ke baru nya ngujungka penyampau semua kes di Sarawak bisi 188 iti kes kenyau kes positif keterubah diripotka kena 13 Mac 2020.
Uggah ti mega Chairman Komiti Mutarka Penusah Ngenyit Nengeri (JPBN) Sarawak madahka semua 32 kes baru nya diperubatka ba Sepital Besai Sarawak (HUS).
“Ari penyampau 32 kes nya, bisi 31 kes iya nya ari Kuching enggau siti (1) kes ari Samarahan.
“Tebal agi kes positif ti diripotka sehari tu iya nya sida ti datai beperesa ba Kompleks Nembiak Lumba enggau Main (KBS), Kuching.,” ku iya dalam Aum Pengarang berita COVID-19 Sarawak di Wisma Bapa Malaysia ditu, kemari.
Ku iya, kenyau 21 Mac 2020, bisi 2,228 iku datai beperesa ba Kompleks Nembiak Lumba enggau Main, lalu 1,160 sampel udah diambi.
Ari penyampau nya (1,160 sampel ke udah diambi) bisi 49 kes nya positif, 771 negatif lalu 340 agi nganti pemutus makmal, ku iya.
“Aku meri terima kasih ngagai individu ti udah datai enggau ati diri empu beperesa.
“Sekali agi kitai nandu mensia mayuh ke bisi ‘kontak’ semak enda ngira bagi kes positif ngambika datai beperesa enggau lengkas awak ke kitai ulih nemu bagi pesakit laban kitai chukup bebendar deka mutuska rentayan penyakit tu ari terus ngelekai,’ ku iya.
Berebak enggau tu, Uggah madahka Sarawak berengkah ari kemari bisi pengulih meresa 2,000 iti ninting hari lalu Sibu mega deka bisi makmal endur meresa kelimpah ari Miri ti mega benung deka bisi kereban nya.
“Pengulih kitai meresa pesakit nambah enggau mayuh amat, tu ngayanka kitai deka nentuka pemayuh ke ulih, individu ke bisi kontak semak tauka kontak kasual diperesa, enda ibuh nganti bisi simptom,” ku iya.
Kelimpah ari nya Uggah madahka kemari bisi 66 kes orang ke dipelaba (PUI) COVID-19 diripotka ti ngujungka penyampau semua bisi 1,288 kes.
Ari semua penyampau kes nya (PUI) bisi 1,045 kes negatif lalu 55 kes PUI agi nganti pemutus makmal.
“Statistik 66 kes PUI baru nitihka Pelilih Menua iya nya Kuching bisi 55 kes, Bau (1), Samarahan (2), Sri Aman (1), Bintulu (1) enggau Miri 6 kes PUI.
“Nyentuk ke diatu, Sarawak udah ngerikod lapan (8) kes pemati kenyau kes keterubah diripotka kena 17 Mac 2020 enggau 14 kes udah dikemendar pansut ari sepital.
Sama bisi ba aum pengarang berita nya kemari, Menteri Kaunsil Kandang Menua enggau Pengawa Berumah, Dato Sri Dr Sim Kui Hian enggau ke bukai.