KUCHING:Kaban Kunsil Nengeri Balai Ringin, Datuk Snowdan Lawan ngansak peranak ba sebuah genturung pendiau ba kandang menua Pantu beperesa pengerai pengudah siku ari peranak menua nya ditemu positif COVID-19.
Ku iya, patut beperesa pengerai ngambika genturung pendiau nya enda dirampit COVID-19 kelebih agi ti bisi ‘kontak’ semak enggau pesakit nya.
Au, endang amat...siku ari sitak aku iya nya di Pantu ditemu positif COVID-19.
Nya alai, aku minta peranak dia anang laun beperesa pengerai sereta nguarantin diri diau di rumah abis nadai pengelama dua minggu,ku iya lebuh dikerandau kemari.
Snowdan ke mega Menteri Muda Nembiak Lumba enggau Main mega minta peranak genturung pendiau bejaku amat enggau raban staf pengerai lebuh ke meresa pengerai nya.
Kelimpah ari nya, seruran nyaga pemeresi diri, suah nuchi jari lalu tentuka kandang ngelingi rumah nya beresi, ku iya.
Rayat ba endur nya ku iya, patut beratka pekara tu dikena mutuska rentayan penyakit COVID-19.
Aku mega ngansak nitihka Atur Nagang Pemindah (PKP) ti masuk renggat kedua tu lalu sama besaup nagang pengelekai penyakit COVID-19, ku iya.