SIBU: Sekeda peranak ari menua Sibu ti bisi ke opis Wang Turu Pengereja Pengawa (KWSP) ditu, ketegal deka mansutka duit taruh sida pagi kemari, tang pulai enggau jari puang.
Kebuah pia, opis KWSP ba Jalai Kampung Dato nya ditutup sementara.
Bisi dua notis dilekatka ba pintu penama opis KWSP nya, lalu siti ari notis tu madahka (Opis KWSP) tutup sementara seriris enggau Atur Nagang Pemindah (PKP) berengkah ari 18 nyentuk 31 Mac.
Nangkanka nya, notis siti agi madahka pengawa nutup opis nya ditampung baru nyentuk ke 14 April.
Kena 23 Mac empai lama, Menteri Besai Tan Sri Muhyiddin Yassin madahka orang ti bisi mayar KWSP ulih ngerejista diri mansutka RM500 ari duit taruh Akaun ll sida sekumbang timpuh 12 bulan berengkah ari 1 April taun tu.
Iya madahka tuju inisiatif nya ngambika raban orang ke bisi mayar ulih nguna duit nya dikena meli barang ke guna sida ninting hari sekumbang timpuh PKP tu.
Berebak enggau tu, Kaban Parlimen Lanang Alice Lau, lebuh ditelefon pengarang berita madah, orang ke ngelawa opis KWSP nya dipelabaka apin nemu opis nya ditutup sementara.
Nya alai, iya minta raban ti deka mansutka duit taruh nya, ngaduka nya nengah telefon tauka online.
Nangkanka nya, Alice mega bisi mantu sekeda raban ngerejista diri minta Bantu Prihatin Nasional (BPN) kenyau ari pagi tadi.