BETONG: Palan Kuarantin COVID-19 iya nya ‘Pusat Sumber Pembangunan Desa’ Layar ditu nyauka tembu ngambika dikena.
Sapit Kepala Menteri Datuk Amar Douglas Uggah Embas madah, diatu pekereja ari kompeni peribit dichiri ba renggat ke penudi nembuka palan nya.
Iya udah ngabas palan kuarantin nya bedau lama udah meda pemujur kereja nya kelimpah meda atur nyikap Sepital Betong dikena napi pengelekai COVID-19 ba bagi menua nya.
Sama bisi datai Kaban Parlimen Betong Datuk Robert Lawson Chuan, Kaban Kunsil Nengeri Layar, Gerald Rentap Jabu enggau Sekretari Politik Kepala Menteri Dr. Richard Rapu.
Sida diberi penerang sentang pengawa nyikap Sepital Betong napi COVID-19 ari Dr. Johny Pangkas.
Naka ke diatu, Betong bisi ngerikodka lapan kes positif COVID-19. Semua sida nya pesereta Ijtimak ba Masjid Sri Petaling kena 28 Februari ngagai 3 Mac nyin tadi.
Sida udah ke Betong lalu ngabiska beberapa hari di Debak pengudah pulai ngulu ijtimak nya.
Tiga ari pesakit ti positif COVID-19 tu iya nya peranak kandang menua tu lalu empat iku agi ari Kedah enggau siku ari Kuala Lumpur, lalu semua sida dianjung berubat ngagai Sepital Sibu.
Betong naka ke diatu ngerikodka 21 iku pesakit dipelaba (PUI) COVID-19.
Nerang sentang palan kuarantin nya, Uggah ke mega Chairman Komiti Mutarka Penusah Ngenyit Nengeri (JPBN) madahka palan nya muat alai 24 iku pesakit ba sesiti maya.
Iya madahka palan kuarantin nya ba palan ke strategik lalu jauh ari palan endur orang diau.
Ku iya, bisi langgur penemu deka ke Dewan Rentap enggau Rumah Dayak nyadi palan kuarantin tambah nyema patut ke guna.
Ku iya nambah, urung 210 iku di Betong udah nerima perintah kuarantin di rumah naka ke diatu.
Ba penemuai nya, Uggah bisi mai 1,200 iti sengkabung idung enggau mulut ngambika disadung ngagai pekereja rintai mua di Sepital Betong enggau pelilih mit Debak.