Anda di sini

Mensia mayuh dilalau seruran ngemeranka pemeresi diri

Advertisement
GERALD
GERALD

BETONG: Ngemeranka pemeresi endang pekara ti pemadu beguna diatu dikena nentuka virus COVID-19 enda ngelekai kelebih agi dalam ruang bilik diri empu.

Kaban Kunsil MNengeri (ADUN) Layar Gerald Rentap Jabu minta komuniti di nengeri tu ti benung dalam Atur Nagang Pemindah (PKP) seruran nentuka pemeresi ba luar tauka dalam rumah.

“Kena mih peluang diau ba rumah tu sama begulai nyaga pemeresi kandang endur kita empu ngambika ulih nyeliahka diri ari penusah ti benung nyadi diatu.

“Aku besampi ngagai semua rayat Sarawak enggau Malaysia laban ti udah bebendar nitihka atur ke pemaik pengerai semua. Pemeresi datai ari rumah,” ku iya.

Nitih ku Rentap, pengudah ba hari kelapan PKP dipejalai, mayuh macham pekara udah dilangkar perintah dikena mantu rayat.

“Beserimbai enggau nya, aku deka meri besai terima kasih ngagai Kepala Menteri Datuk Patinggi Abang Johari Tun Openg (Abang Jo) enggau perintah Gabungan Parti Sarawak (GPS) ke udah madahka Pakej Bantu Khas Sarawakku Sayang dikena mantu ngelempungka tating belanja maya pengelekai igi penyakit COVID-19 tu.

“Bantu tu udah ngerundingka penanggul ti ditapi maya diatu enggau meri diskaun ngagai penguna elekterik, ai beresi, suwa ngagai pedaja di pasar tauka tamu, nadai permit tauka lisin ngagai orang ti bejual sereta diskaun chukai ninting taun ungkup premis endur diau, komersil sereta industri.

“Kepala Menteri mega udah madahka bayar ungkup raban B40 sepenyampau RM250 sebulan pengelama enam bulan ari bulan April ti ngaul lebih 430,000 rayat Sarawak.

“Bantu insentif khas ninting bulan mega ngagai raban ti gawa ba rintai mua (frontliner) ti udah bebendar mutarka penanggul tu.

“Berindik ari nya mega kitai meri terima kasih ngagai raban Opis Menteri Pengerai (KKM), PDRM, ATM, Imigresyen enggau RELA ba pemendar sida ti udah komited dalam megai tanggungpengawa nagang pengelekai igi penyakit tu.

“Pia mega, Kepala Menteri dalam penerang iya udah madahka iya nya perintah nengeri deka nyadung dua juta sengkabung idung enggau mulut ungkup rayat Sarawak.

“Tu deka diatur Komiti Mutarka Penusah Ngenyit (JBP) Bagi Menua enda lama agi.

“Beserimbai enggau nya, aku minta peranak di Betong ngambika terus sabar lalu dalam gaya ke diatu titih mih jaku tangkan raban ti bekuasa.

“Aku mega beterima kasih ngagai Komiti Pemansang enggau Pengelikun Genturung Pendiau (JKKK) rumah panjai sereta genturung pendiau ti udah jampat meri notis ti enda nerima penatai orang luar ke kandang endur sida dikena nagang pengelekai virus tu.

“Penegap runding baka tu mih siti ari chara dikena nentuka virus tu enda ngelekai ba kandang menua sida.

“Aku besampi ngambika kitai semua diibun Petara sereta mega pengawa kitai tu seruran nerima berekat,” ku iya.