Anda di sini

COVID-19: Empat kes baru positif di Sarawak

Advertisement

KUCHING: Sarawak naka pukul 5 lemai kemari ngerikod 91 kes positif COVID-19, ti nyengkaum empat (4) kes baru positif.

Nitihka penerang berita ari Sekretariat Komiti Mutarka Penusah Ngenyit Nengeri (JPBN) Sarawak, penyampau 91 kes nya kenyau ari kes keterubah positif diripotka kena 13 Mac 2020.

“Semua (empat) kes baru tu diperubat ba Sepital Besai Sarawak (HUS) bisi tiga kes enggau siti kes ba Sepital Bintulu,” ku penerang nya kemari.

Nambahka nya, naka kemari bisi  diripotka 29 kes baru orang dipelabka (PUI) dirampit COVID-19, ti ngujungka penyampau semua PUI di nengeri tu 908 kes.

Ari penyampau nya, 770 kes nya negatif lalu 47 kes PUI agi nganti pemutus ari makmal.

Nyentuk pukul 5 lemai kemari, Sarawak udah ngerikod lima (5) pemati kenyau kes keterubah diripotka kena 17 Mac 2020.

Kelimpah ari nya JPBN Sarawak kemari setuju ngemendarka kedai nyual pemakai enggau jelu tupi  (pet shop) tauka Klinik Jelu beoperasyen maya Atur Nagang Pemindah tu.

“ Kedai nyual pemakai enggau jelu tupi  tauka Klinik Jelu dikemendarka beoperasyen maya Atur Nagang Pemindah tu, berengkah ari pukul 7 pagi ngagai pukul 7 malam berengkah diteritka 26 Mac 2020,” ku penerang berita nya.