BINTULU: Peranak di bagi menua tu enda patut irau bekaul bekal pemakai pemun ti bisi diatu nya chukup lalu ulih dibeli ari palan bebeli barang semanjai timpuh Atur Nagang Pemindah (PKP) tu.
Ketuai Penerit Adat Opis Menteri Dagang Dalam Nengeri enggau Pekara Penguna (KPDNHEP) Bintulu Nazari Hassan madah, peranak mega ditangkan ngambika enda ngaga ‘panic buying’ semanjai timpuh PKP dipejalai nya berengkah 18 Mac nyentuk 31 Mac tu.
Ku iya, naka diatu bekal pemakai pemun baka gula, minyak nyumai, tepung, pemakai dalam tin, minyak petrol enggau diesel sereta barang pemakai ke udah dibungkus ke bukai nya chukup ba palan bebeli barang.
Taja pia, pengawa matau ninting hari udah dipejalai lalu diteruska ti ngaul premis nyual barang ti diguna ninting hari kelebih agi ba renggat pemurung besai, palan bebelika barang enggau premis dagang ke bukai.
“Penguna dipinta enda ngaga ‘panic buying’ laban KPDNHEP Bintulu seruran matau sereta nentuka bekal barang ti diguna ninting hari seruran chukup ba pasar,” ku iya madah nengah penerang media, kemari.
Maya timpuh PKP ku iya, KPDNHEP ditu nadai nerima ripot ti bekaul enggau (pengurang) barang bekal guna pemun semina ti ditemu bekal sengkabung idung enggau mulut sereta penuchi jari (hand sanitizer) ti bisi napi penanggul bekal stok naka ke diatu.
“KPDNHEP Bintulu endang beterima kasih ngagai pemurung, palan bebeli barang enggau premis dagang ke bukai ti bisi kaul terus tauka enda laban udah meri kerejasama ke manah ngagai kami lebuh ti matau bekal barang guna pemun tu lalu pia mega nentuka nya (bekal barang pemun) chukup di pasar,” ku iya ke mega bisi meresa ba palan bebeli barang Bintulu begulai enggau raban sida ditu kemari.