Anda di sini

Bantu RM 250 dikearapka ditangkan enggau pemeri bantu lengkas: Sangi

Advertisement

KUCHING: Kelimpah ari meri bantu khas mata duit sepenyampau RM250 sebulan dalam timpuh enam bulan ungkup rayat B40, perintah nengeri dikearapka ulih berunding sereta merambu meri bantu lengkas. Tuai Rumah (TR) Kampung Kudei Baru Iban, Tr Sangi Abu madahka bantu datai lengkas nya beguna amat ngagai ruang bilik ti tusah ari sukut belanja.

Taja pia bantu khas sepenyampau RM250 sebulan dalam timpuh enam bulan ke dibantaika Kepala Menteri chukup mandangka perintah nengeri amat betatika penusah ti ditapi rayat maya Atur Nagang Pemindah dikena nagang pengerekai COVID-19, ku iya.

“Bantu bukai dalam 16 lis bantu perintah nengeri, semua bantu nya ulih ngelempungka penusah rayat dalam timpuh ke diatu.

“Semina aku deka meri perambu iya nya bantu lengkas patut bisi diatur sereta patut udah dipejalaika perintah dalam timpuh diatu lalu bantu nya iya nya barang dapur beras, gula, kopi, teh, minyak sumai, telu enggau ke bukai ti patut.

“Bantu tu beguna amat ba ruang bilik ke enda nadai penatai pemisi tauka merinsa pendiau baka indai tunggal, orang tuai, raban orang nyelai pendiau enggau tuai ruang bilik (KIR) dalam kategori seranta,” ku iya madah ngagai Utusan Borneo, kemari.

Tr Sangi meri penemu, bantu lengkas nya mega tau disua nengah tuai rumah tauka ketuai bansa.

Iya meri penerang nya lebuh dipinta meri penemu bekaul enggau bantu ke diberi perintah nengeri ari baruh Pakej Bantu Khas Sarawakku Sayang ti dibantaika Kepala Menteri Datuk Patinggi Abang Johari Tun Openg kena 23 Mac 2020.

Bantu nya ku Abang Johari deka dipasukka terus ke akaun penerima ninting bulan pengelama enam bulan berengkah ari bulan April ngagai September 2020.

Ku Abang Johari bantu nya deka meri penguntung enggau pengelantang ngagai 430,000 rayat B40 ba nengeri tu sereta sida nya deka nerima semua sepenyampau RM1,500 dalam timpuh enam bulan sereta perintah nengeri ngungkupka belanja sepenyampau RM645 juta ke tuju nya.

Peminta bantu khas nya, rayat B40 tau nitihka lis penerima Bantu Sara Hidup ti dipansutka Opis Asil Dalam Nengeri.

Kelimpah ari nya, Tr Sangi mega muji perintah nengeri ti betatika rintai mua kelebih agi ba sepital, nya ngayanka perintah nengeri chukup manah laban ngingat sereta malas pemanah raban nya ti belabanka nyawa diri ketegal deka ngidupka nyawa rayat nengeri tu ti bekaul enggau COVID-19.

Bantu khas nya mega chukup betati sereta nyengkaum raban polis, sedadu, Rela sereta raban penerit adat ke bukai ti mega  ba rintai mua,  gawa siang malam  laban deka nentuka Atur Nagang Pemindah dititihka rayat menua kitai.

“Aku ngarika nembiak redak Kampung Kudei baru meri terima kasih ke bantu ti dibantaika perintah nengeri ti betuaika Kepala Menteri Datuk Patinggi Abang Johari Tun Openg,” ku iya.