Anda di sini

Peranak Rumah Kubu Sandum ngatur pengawa miring ngambika enda dirampit COVID-19

Advertisement
 Sida ngengkah notis nagang orang luar tama ngagai kandang menua Nanga Tada.
ENDA DIKEMENDARKA TAMA: Sida ngengkah notis nagang orang luar tama ngagai kandang menua Nanga Tada.

SIBU: Dikena minta enggau nyaga pengelikun diri ari kena rampit Covid-19, peranak Rumah Kubu Sandum, Skim Palan Pengentap Pendiau Nanga Tada ngatur pengawa miring ke rumah panjai sida ditu, apin lama ke udah.

Pengawa tu betuaika Tuai Rumah Kubu enggau sida serumah ari 36 pintu ti diarika ketuai bilik ba tetiap pintu rumah panjai nya.

Ku iya, pengawa nya dikena nyaga sereta nagang diri sida serumah ari sebarang bengkah penyakit berampit, kelebih agi virus Covid-19 tu.

“Kami besampi sereta minta berekat dikena ngenyauhka kami serumah ari kena rampit virus tu.

“Tu mih pengawa miring diatur kami maya timpuh tusah tauka bisi penanggul baka ke diatu,” ku iya lebuh ditelefon pengarang berita, bedau lama udah.

Nitihku Kubu, semina ketuai bilik aja dikangau ngulu pengawa miring nya belalauka atur diberi perintah ke ngemendar sereta natak penyampau 50 iku aja ba sesiti pengawa.

Taja pan diau jauh ari mengeri,seraka sosial di rumah panjai mega patut dijaga.

“Ukai reti kami ke diau jauh ari mengeri, kami berasai lantang tauka kandang menua Nanga Tada tu nadai peluang kena rampit Covid-19.

“Kitai pan sama nemu, virus tu chukup mudah ngelekai ngagai sesiku tubuh mensia enda ngira umur tauka sapa,” ku iya.

Nya alai, iya ngarapka pengudah pengawa miring tu ila, semua sampi enggau peminta sida didinga sereta dibantu Petara Ke Pemadu Bekuasa ngambika semua peranak ba kandang menua nya gerai belama.

Lebuh ditanya senentang Atur Nagang Pemindah (PKP) ke berengkah dipejalaika dalam timpuh ke diatu, Kubu madahka semua nembiak redak iya ngemeran sereta ngemeratka atur perintah nya, lalu sida serumah diau dirumah aja.

“Sida diau ba bilik empu lalu sida ke nembiak pan sama mega. Sida ngasi sereta mendingka atur PKP ari perintah besai,” ku Kubu mandangka diri puas ati enggau ulah bala nembiak redak iya ba maya ke diatu.

Berebak enggau tu, Kaban Opis Pelilih Menua Kanowit ke megai tanggungpengawa nyaga kandang menua Nanga Tada, Kunsilor Bunut Kubu madahka Komiti Pemansang enggau Pengelikun Genturung Pendiau (JKKK) Indu Nanga Tada mega netapka diri nagang orang luar tama ngagai kandang menua tu.

“JKKK Nanga Tada ke betuaika Pengulu Ugap Seribu netapka pengawa nagang nya enggau raban komiti enda ngemendarka sesapa aja orang ari luar tama ngagai Nanga Tada.

“Tu nyengakaum peranak Nanga Tada empu ke diau di mengeri, enda dikemendarka pulai ke menua kitu enti nadai pekara berat tauka pekara ngenyit.

“Kelimpah ari nya, kami ke diau ba Nanga Tada tu mega ditagang pansut ke mengeri tauka palan ke bukai, enti nadai kebuah berat tauka pekara ngenyit,” ku iya.

Dikena neritka atur pengawa nagang pemindah tu, iya begulai enggau Tuai Rumah Kubu sereta Serakup Nembiak Nanga Tada udah nirika notis nagang orang tama ngagai Skim Palan Pengentap Pendiau Nanga Tada, kilah ensana.

Ku iya, Palan Pengentap Pendiau Nanga Tada nya ngembuan 18 buah rumah panjai enggau penyampau tubuh peranak dia ke lebih ari 1,00 iku.