Anda di sini

Pakej Bantu Khas kelai perintah Sarawak ngemeratka pengelantang rayat

Advertisement

SIBU: Pakej Bantu Khas Sarawakku Sayang ke udah dibantai dikena ngurangka empas ketegal pandemik Penyakit Coronavirus 2019 (COVID-19) mandangka perintah nengeri ti dipegai Kepala Menteri Datuk Patinggi Abang Johari Tun Openg ngemerat ke pengelantang rayat.

Menteri Menteri Dagang Dalam Menua enggau Pekara Penguna (KPDNHEP) Datuk Patinggi Alexander Nanta Linggi madah nya pengeransing ti dipandangka nya patut diberi puji sereta sukung ari rayat.

Abang Johari udah mantaika 16 rintai pekara ari baruh pakej nya kena Hari Satu.

“Sarawak sebuah ari nengeri dalam menua tu ti dulu ngaga pemutus kediri dikena mantu rayat iya empu.

“Perintah nengeri ngena belanja RM1.15 bilion dikena mantu lalu ukai semina meri elawin khas ninting bulan ngagai pengereja pengawa ba baris mua tang mega meri 50 peratus diskaun ungkup bansal enggau makit ungkup lebih 10,000 iku pedaja pengelama enam bulan.

“Baka nya mega bisi ditangguh bayar injau ungkup semilan bulan ungkup orang dagang mit enggau jelan pemesai di nengeri tu,” ku Nanta madah nengah pesan video ba ‘Facebook’ iya kena Hari Satu nyin tadi.

Nanta ke mega Kaban Parlimen Kapit madahka sentang pekara bukai iya nya meli dua juta sengkabung idung enggau mulut ari perintah nengeri ti diberi enda bebayar ngagai rayat Sarawak.

Iya muji perintah Sarawak ba pemutus nya ti meli sengkabung idung enggau mulut ungkup rayat laban nemu menua diatu napi penanggul bekal item nya nadai dijual ba makit.

Sengkabung idung enggau mulut nya deka disadung nengah Komiti Mutarka Penusah Ngenyit Nengeri.

“Nengah semua rintai pakej bantu tu, rayat Sarawak dikira benasit manah laban perintah nengeri jampat ngaga pemutus nya ungkup rayat iya.

“Lebuh COVID-19 keterubah ditemu di Wuhan, China dalam bulan Januari, kami ti keterubah ngetuka penama temuai China enggau temuai ari menua luar ke bukai ke udah ngelawa ngagai China tama ke nengeri tu.

“Uji pikir enti perintah nengeri enda ngemendarka orang menua luar tu tama. Gaya tu deka nyadi balat agi ari diatu,” ku iya madah.

Pekara bukai ti ti dipadah Abang Johari nyengkaum meri diskaun ngagai 25 peratus ba bayar bil utiliti, bantu mata duit RM250 ninting bulan ungkup enam bulan ngagai 430,000 iku rayat Sarawak ari baruh raban B40, diskaun ungkup ‘kadar penilaian’, diskaun suwa tanah, suwa lisen hotel, RM juta bantu dikena meli perengka pengerai sepital enggau diskaun suwa rumah Perbadanan Pembangunan Perumahan.