KUCHING: Agih belanja tambah RM20 juta ungkup Skim Mikro Kredit ngagai orang dagang mit enggau jelan pemesai (PKS) ari baruh Pakej Bantu Khas Sarawakku Sayang dipeda amat signifikan.
Presiden Dewan Orang Dagang Bumiputera Sarawak (DUBS) Datu Abang Helmi Ikhwan madah nya ukai semina ulih ngerembaika agi dagang PKS aja tang ulih tegap semanjai timpuh napi pemar ti ditapi menua maya diatu.
Taja pia, iya ngarap penyampau penguntung ti minimum ti diberi ngagai orang dagang Bumiputera enggau peminjau ulih diberi enggau lengkas.
“DBUS ngelaluka Pakej Bantu Khas (Sarawakku Sayang) ti dibantai Kepala Menteri (Datuk Patinggi Abang Johari Tun Openg) kemari (Hari Satu).
“Bantu penuh tu endang diterima manah laban nya mantu rayat kelebih agi orang dagang Bumiputera dalam sektor PKS kelimpah bantu bukai nyengkaum diskaun 15 peratus bil elekterik enggau ai ungkup penguna komersial,” ku iya maya ditelefon kemari.
Abang Helmi nambah, diskaun 50 peratus ba suwa pasar enggau pedaja sereta diskaun 25 peratus ‘kadar taksiran’ mega mantu pedaja Bumiputera semanjai penurun tikas ekonomi diatu.
Sentang bantu khas ngagai pengereja pengawa perubat ba baris mua, iya pechaya semua rayat Sarawak amat beterima kasih ba atas dedikasi, ulah ti enda bekira sereta ngemeratka tanggungpengawa ti ditukuka pemadu manah ba renggat global.
“Kami semua ngasai insentif khas tu ungkup sida semina siti meri tanda basa atas bantu sida ti enda ulih dikira ngagai mensia mayuh, kelebih agi rayat Sarawak,” ku iya.
Kena Hari Satu, Abang Johari udah mantaika Pakej Bantu Khas Sarawakku Sayang ti mungkur agih belanja sepenyampau urung RM1.154 bilion.
Iya madah pakej bantu khas nya siti inisiatif perintah nengeri dikena ngurangka empas pengelekai COVID-19 ngagai ekonomi enggau ke pengelantang rayat.
Abang Johari nerangka pakej bantu khas nya bisi 16 chara proaktif ba pengereja pengawa baris mua, isi rumah enggau komuniti dagang ti begunaka sukung maya diatu.
Chara tu nyengkaum Diskaun Bil Elekterik, Diskaun Bil Ai, Bantu Khas Sarawakku Sayang, Insentif Ninting Bulan Khas Ungkus Pengereja Pengawa Baris Mua Dalam COVID-19, Diskaun Ungkup Suwa Pasar enggau Bansal, ‘Pelepasan Yuran Permit dan Lesen’ sereta Diskaun 25 Peratus ‘Kadar Taksiran’.
Nambahka nya, chara ke bukai ari baruh pakej bantu khas iya nya Nangguhka Mayar Pulai Baru Skim Pinjau Industri Mit enggau Jelan Pemesai (SPIKS), Tambah RM20 juta Skim Mikro Kredit Ungkup Semua Industri Mit enggau Jelan Pemesai, Diskaun 30 Peratus Ungkup Suwa Tanah, Nangguh Premium Tanah enggau ‘Pelepasan Yuran Lesen Hotel’ enggau Rumah Endur Diau.
Tu mega nyengkaum Sengkabung idung enggau mulut enda bebayar, Kereban Dikena Nyaga Pengereja Pengawa enggau Ke guna lengkas Sepital, Pemakai Semua Pengereja Pengawa Baris Mua Maya Atur Nagang Pemindah (PKP) sereta Diskaun 50 peratus Sewa HDC (Perbadanan Pembangunan Perumahan) Pengelama Enam Bulan.
Abang Johari mega nerang pakej bantu khas nya mungkur ungkus belanja terus perintah nengeri sepenyampau RM974.75 juta dikena ngurangka empas penurun ekonomi enggau ngurangka tating ti ditapi rayat.