MUKAH: Ketuai Indu Parti Pesaka Bumiputera Bersatu (PBB) Sarawak, Dato Sri Fatimah Abdulah mandahka Gabungan Parti Sarawak (GPS) sebuah perintah ti endang ngemeratka pengelantang rayat.
Tu ku iya amat nyata nengah semua polisi sereta bantu ti ditentuka terus datai ngagai rayat iya empu.
“Kitai udah nemu mayuh bengkah bantu baka Endowment Fund, Bantu Indai ti Beranak, bantu ungkup taska sereta tadika, Kenyalang Gold Card, bantu khas pesakit hemodialisis sereta mayuh agi, semuanya ungkup semua raban bansa di nengeri tu,” ku iya lebuh ba ‘Program Sarawak Kita Empun’ beserimbai enggau Retreat Parti Pesaka Bumiputera Bersatu (PBB) Dalat di Stadium Penyerakup Dalat bedau lama udah.
Nitih ku iya, nadai ulih dibandingka enggau sebarang perintah nengeri di menua tu, perintah nengeri tu endang silik dalam meri bantu.
Rintai bantu nya ku iya semina ba baruh opis menteri iya nya Opis Menteri Pengintu Pengelantang Pendiau, Komuniti, Orang Indu, Ruang Bilik enggau Pemansang Anak Mit sereta bedau agi bantu ke bukai ari opis menteri bukai mega ba baruh pegai GPS.
Nya alai sukung tegap sereta enda besengki penemu mesti seruran diberi ari rayat ngagai GPS ngambika terus nyaga penyerakup rayat kelebih nengeri Sarawak.
Kelimpah enggau nya, senentang pengawa bepilih nengeri (PRN), iya deka tiap jentera parti sekalika sayap orang indu, raban nembiak tauka apai seruran nyingkap diri ninting hari.
“Semua sayap mesti bekerejasama dikena nentuka pemujur,” ku iya nerang.
PRN ti deka datai ku iya siti ari gaya tauka senario baru kelimpah simbol ti dikena baru sereta mega raban belaban ti baru deka ditapi.
Iya mega ngelalau ngambika pelasar digital mesti dikeingat nyadi sebagi ari ngelakuka chap tauka simbol baru dalam PRN ti deka datai.
Sama bisi datai Speaker Kunsil Nengeri (DUN) Sarawak ti mega Chairman Mendam PBB Datuk Amar Mohd Asfia Awang Nassar sereta ADUN Tellian Yussibnosh Balo.