KUCHING: Raban Indu Parti Keadilan Rakyat (PKR) Sarawak ngarapka chalun indu bisi ditambah sereta diberi peluang bediri minta pilih ba Pengawa Bepilih Nengeri (PRN) ke deka datai.
Tuai Raban Indu PKR Sarawak, Nurhanim Mokhsen madahka beberapa sitak ulih dipenggika ngagai chalun indu ke ulih menang.
“Naka ke diatu aku meda bisi lapan sitak ulih diungkupka ngagai chalun indu, ba pengawa bepilih sebedau tu bisi enam iku chalun indu.
“Kami ngasaika ulih mantaika chalun indu, kami deka negika orang indu ke bisi peluang nyadi chalun. Kami ngarapka taun tu ulih ditambah abis nadai ditambah dua iku chalun indu.
“Tang dalam politik mayuh macham pekara ulih nyadi, pemayuh nya ulih nambah sereta ulih mega dikurangka, tang kami ngarapka deka mayuh agi (chalun indu),” ku iya lebuh dikerandau.
Dulu ari nya Nurhanim nerima surat chiri nyadi Penyelaras Parlimen (PP) P.194 Petra Jaya ti diatur nyerumba Majlis Penyerahan Watikah Penyelaras Parlimen Negeri Sarawak ngagai 19 iku PP di nengeri tu, ti diatur ba sebuah hotel ditu, kemari.
Berebak enggau tu iya madahka bakal chalun ari raban indu parti nya di Sarawak udah nyikap diri napi pengawa bepilih.
Iya mega arap bendar enggau gaya politik diatu lebih agi Pakatan Harapan nyadi perintah besai, chalun raban indu PKR deka lebih manah ari pengawa bepilih ke sebedau tu.
“Kami udah ngatur beberapa sesi latih tauka woksyop dikena betapi enggau pengawa bepilih ke deka datai.
“Kami arap bendar enggau gaya politik diatu enggau perintah besai ti baru, peluang ungkup Raban Indu Keadilan dalam PRN ke deka datai lebih manah sereta engka ulih menang ba beberapa sitak,” ku iya.
Nurhanim dulu ari nya ngenang pasal Penyelaras Parlimen madahka nya siti singkang positif perintah Pakatan Harapan ti deka nentuka rayat ba sitak tauka parlimen ke endur pengari PH alah maya PRU14 bulih bantu sereta enda tinggal ari pemansang.
“Tu siti inisiatif ti chukup engekeman dalam juluk perintah besai deka ngenukuka semua rayat ngasaika pemansang enggau nadai bechiping,” ku iya.
Nitih ku iya, maya licha semua 19 iku Penyelaras Parlimen ti dichirika Majlis Tindakan Pembangunan Negeri Sarawak kemari diberi penerang pasal garis lalau bakani chara ngena agih belanja ti diberi.
Iya madahka agih belanja RM500,000 ti diungkupka ngagai Penyelaras Parlimen ti ngarika sitak parlimen nyau deka sama enggau ke diungkupka ngagai Kaban Parlimen, ulih dikena mantu enggau meri ngagai orang ti begunaka nya.
“Ungkup Petra Jaya kami bisi penanggul seranta mengeri (kemiskinan bandar) enggau kedua penanggul rama baka gian dadah ba raban sida ke biak. Aku ngasaika tu dua penguji ti ditapi dalam Petra Jaya.
“Aku enggau penemu aku empu, ngasaika kededua isu tu chukup semak ba aku. Aku deka betemu enggau sida ejensi ti bekaul berandau sereta ngiga jalai bakani ulih mantu dalam isu tu sereta meri ungkup belanja nengah program ti diatur.
“Kami deka duduk berandau dulu enggau ejensi ti bekaul meda chara ti pemadu engekaman dikena mutarka penanggul tu, ukai senang sereta berengkah ari baruh. Aku arap bendar ulih ngiga chara mutarka tauka ngurangka penanggul tu,” ku iya.